對我來說，25日公布的公醫明年加費大計，遠遠緊要過周前財爺公布的年度預算案。
唔怕俾人鬧：我基本上支持。
但冇諗到當局咁夠pok。最厲害既唔係門診CT/MRI收500蚊，而係門診由50蚊加3倍到200蚊。
相對來說，急症由180元增到400元，已算客氣。雖然危殆/危急症費用全免，但你想享用乜？
按以往的社會風氣，事前以為加幅最多不過50%。
而家呢個加幅豈止改革，直情係「革命」！
當局咁勇，說白了：在新時代下，政府強勢！
昔日政風、人口老化加重開支
舊日，泛民壟斷政治市場。政治上只有一個目的：普選！經濟上反對發展；社會/民生上循例借基層來壓政府價，加大政治壓力，逼當局用普選來交換。
因此，公家收費幾年一次加20%已不得了，年均怕僅超通脹。
故在新時代前，60、70年前英治定下的超低收費結構，永遠無法改善。後果短期是需求長期爆棚，嚴重擠塞/congestion；長遠則庫房遲早爆煲。
近年連年的千億赤字，基本上與此有關。
當然，更根本的因素是人口老化：長者在750萬人裏的佔比穩步上升，壽命也愈來愈長，加大醫療、社福開支。
為超高政府部門運作辯解？
（這並非為政府部門超高的運作費用，包括官員和公僕的超市場待遇辯解。改革公共服務收費結構的同時，特首是否也要搵個港版Elon Musk幫吓眼？至於美國Trump王不經正式程序成立的炒人部門DOGE，香港只要守住歷來的法治程序，是不會出現的。我們大可放心！）
門診難求 私醫也日日滿額
急症收400蚊若真能鼓勵頭暈身㷫、屙嘔肚痛的求診者改看住處附近收費相若的私醫，縮短急症室輪候的時間，讓醫護有較寬裕的時間照顧較少的求診者，尤其是危重者，善莫大焉。問題是，如何確保部分衝急症的市民改看私醫後，後者不會借勢加價？
我近月也因為傷風感冒看過收費300-400蚊的私醫，服務滿意。但收費可能在私醫裏算比較平，日日都滿額。非熟客冇得預約，幾乎醫務所一開門就要去輪候，等醫生有空檔時叫你遞補。
目前門診收50蚊的做法，基本上24小時全港的政府診所都爆棚，連長洲都冇位。我上月因為腰扭傷（先看了幾次大學中醫，相信盤骨髂骨與骶骨之間的關節有傷。但限於費用，難以長時間睇），按政府門診預約app的建議，每個鐘click入睇邊個診所有位。初初只留意區內的診所，後來發覺根本不可能有位，逐步擴大到全港，發覺仍然係逢診所都「暫時滿額」。最後，唔知點神起上嚟，突然蹦出一個未滿既sign，條件反射地click入，才算搶到位。
時間短、服務淺 望改革能改善
我去個間診要轉車，地鐵大約10個站。我唔熟附近，怕遲到被DQ，早咗成個鐘頭到。候診大堂大把空位。但輪到叫我入房，已過咗預約時間個幾鐘，換言之，我頭尾係診所坐咗約2.5鐘，坐到要起身做下伸展。
結果入到醫生房，由推門入去到出番來，最多3分鐘。我講完症狀和可能的成因後，醫生做咗一個我覺得重要的檢查：試下腿部有冇痛。我覺得冇。
由於腰痛冇放射落腿部，醫生判斷係肌肉痛，無關筋腱、神經，睇來唔係大件事。於是開必理痛同一種肌肉酸痛搽的軟膏。兩種都藥房有售，毋須醫生寫紙。
換了改革後200蚊一次的門診，我是否有權問醫生可否照X光？甚至可否俾500蚊照MRI，睇下軟組織有否撕裂（CT無法顯示軟組織）？又或者請物理治療部評估傷患的性質和程度？
晚了。就此打住。希望改革後，醫生能給病人多一些時間和關顧，給機會病人表達他們的感覺。
原刊於作者網誌，本社獲作者授權轉載。
