正如很多人，Messi一到日本就不再傷到不能出場，我也料到。我後知後覺的是：直到昨天還不相信，球王在港全場坐冷板，板臉離場，與政治有關，並非簡單的商業/職業問題。要到今午，飲飲下午茶才突然諗到個 wild guess.
但一無證據二無情報，純屬斷估。就如刑偵劇裏既兩種警探：A派信證據，最好係實物；B派信直覺。A vs B相當於哲學上的唯物vs唯心。我今日的頓悟純屬唯心，只能當玩，千祈咪當真。
冷面背後原因不簡單
美斯16-17歲就打巴塞正選，而家36/37歲，走江湖已20年，乜場面未見過。佢本性上係好好先生，知道萬計球迷為佢而來，俾佢揀，應該至少會落場十分八分鐘，耍番幾下花槍，有個交代。
而以佢嘅江湖地位，只要佢想，班主、教練唔會逆佢嘅意，係都唔俾出場。但這次在港一啲面都唔俾，背後原因應該唔係咁簡單。
今午我突然醒起：佢而家踢美職，一旦涉及東主國眼中的大是大非，點都要遵從其國策。香港排頭的幾名司/局長係白宮眼中的「拒絕來往戶」。「美國」運動員點能夠同佢地握手言歡？
不只此，美斯所屬的國際邁亞密位於Florida/佛羅里達州。佛州州長 Ron DeSantis 反華仲狂過 Donald Trump，只不過在右派選民裏人氣差得遠，角逐共和黨總統提名不敵而已。但國際邁亞密若俾州長覺得「資敵」，今後在佛州怕冇好日子過。
更麻煩的是：民望高過現任總統 Biden 嘅阿 Trump，私人嘅別墅 Mar-a-Lago 就係邁亞密地區。換言之，國際邁亞密班主碧咸同美斯都係阿 Trump 嘅隔離鄰舍。與「敵人」握手，萬一 Trump 再次入主白宮，只怕冇埞企。
誠然，香港目前嘅新時代始自2010中，至今已三年半，上國際頭版嘅黎某國安案也已開審了一段日子。但國際邁亞密食香港茶禮時，可能冇諗到會咁嚴重。不排除是飛往香港途中，接到警示，只好夾硬縮沙：寧教我負港人，休教港人負我！
原刊於作者網誌，本社獲作者授權轉載。
