星期六早上，有老友到公司吹水，佢話長實（1113）大減價成功，油塘親海駅II就算不是「一Q清袋」，賣九成是沒有問題，不過長實低價賣樓，是否對後市有影響？我話當然有影響，不過是正面影響，除了帶出潛在購買力之外，仲為樓市築了一條底線，我唔敢講樓市是否見底，但在短期內樓市不會大跌，老友話唔明白我所講道理。
這是一個時間問題，今日大家都話長實劈價賣樓，不過大家冇留意到長實就算今日唔賣，在兩年之後，當樓盤接近入伙，長實要清售當時仍未售出，俗稱貨尾的單位，我夠膽講，屆時的貨尾單位，就是今日長實出售的單位，到時候就會有人話那些貨尾單位絕不便宜。換句話說，長實今日只是出售未來貨尾單位，如果能夠賣個滿堂紅，對樓市是打了一支強心針，是好是壞大家自己去諗。
若賣個滿堂紅 如對樓市打強心針
對於長實減價賣樓，大家似乎想得太遠，長實是地產發展商，每一個單位對他們來說是貨物，而貨物最終都是要出售，最難出售的並不是貨物本身，而是貨尾，即使是優質貨物，如果賣到貨尾，唔減價很難賣得走，普通貨物每一件都是一樣，很難知道哪一件貨物將會變成貨尾，但樓宅不同，可以從樓層，方向分析，未出售就大概知道哪些是貨尾單位。既然知道，點解唔可以一早賣，如果未來貨尾單位的銷售情况理想，那個樓盤以至整個樓市都唔會有問題，千祈唔好話連李嘉誠都劈價賣樓，樓市一定大冧。
樓宇對於地產發展商來說是貨物，最終都要出售，所以，有時會因應自己需求或者市場形勢而賣樓，就算低於市價亦會接受，但樓宇對於個人來說是必需品，沒有一定要賣的必要，除非個人問題例如移民、財務，甚至換樓，才會考慮賣樓。如果在沒有迫切性情况下賣樓，賣了之後就要租樓，最後發覺原來自己替人供樓。所以，千祈唔好以為長實劈價賣樓是一個壞消息，因為長實所賣的是貨物，不是必需品。
註：
作者指長實減價親海駅II開賣，是預售未來的貨尾單位，如果能夠賣個滿堂紅，對樓市是打了一支強心針。
原刊於《明報》，本社獲作者授權轉載。
