有老友留意到老C不斷叫政府減辣，意思是取消所有打壓樓市的特別印花稅，而我則希望政府放寬逆周期措施，最後政府選擇我的提議，老C唔係幾滿意，並且話樓市牛市永遠不會來臨。老友唔明白點解採用我的提議，話晒老C的經驗比我豐富得多，而且又有第一手資料，政府是否做錯了？
我首先聲明，我只是塗鴉式寫文章，政府是不會聽取我的意見，而事實上政府今次做得極對，在疫情之後，百廢待興，在在需財，但銀行竟然向那些用物業抵押借錢四成的生意人追收差額，銀行當然不會話是自己意思，而是話金管局指引，那些做生意的業主不但得唔到銀行支援，仲要還錢畀銀行，試問香港又怎可以再出發？
放寬樓按勝過撤銷辣招稅
現在金管局發出清晰指引，物業可以用資產抵押借足五成，就算那些做生意的業主未必可以向銀行借到錢，但最低限度唔使畀銀行追差額，唔使賣樓還債，少了供應，樓市向下調整的壓力減少，樓價就算再跌都唔會跌得幾多。
萬一美聯儲局終止加息，甚至因通脹下降而減息，樓市就會調頭回升，放寬逆周期措施就有雙重效能，首先是穩定樓市，在利息下降以及經濟環境轉好，推動樓市上升。
倘若政府取消辣招稅，買樓的人一定會增加，但那些大多數是要付辣招稅的人，按正常情况，樓價一定會上升，但在利息高企之下，升幅不會太顯著，對社會沒有多大有利影響，銀行仍然要向那些借貸四成的業主追收差額，再出發仍然要暫停。不過，對於要以物業成交量作為生存首要條件的物業代理就得到最大利益，這亦是老C要求政府取消辣招稅的主要原因。但經濟唔好，買到樓又如何，最終又要蝕讓，何不固本培元，搞掂香港經濟，樓市就會價量齊升。
原刊於《明報》，本社獲作者授權轉載。
