年近歲晚，老婆同一班舊同學食年夜飯，發覺全班同學最蠢嗰幾個，原來最早買樓，甚至個別同學已經有幾層樓，愈聰明的同學則愈遲買樓，最聰明嗰個現在仍然租樓住，雖然他仍然揮灑自如，但大家都知道只是強顏歡笑而已。
老婆唔明白點解最蠢的同學最早買樓，我諗我老婆生物科唔合格，不過我唔敢問。其實，這是生物生存之道，一巢小鳥，最聰明嗰隻會推最蠢嗰隻出鳥巢，推吓一隻，推吓又一隻，到最後，最聰明的小鳥因為冇其他鳥推佢出鳥巢，反而唔識飛，最後因小鳥母親離開，那隻聰明小鳥不是餓死就是成為其他動物的點心。這叫笨鳥先飛，其實笨鳥唔係敢飛，只係被聰明的小鳥推出鳥巢。老實說，唔係一定飛得起，鳥巢下面亦有不少跌死小鳥，聰明的小鳥見到更加唔敢飛；不過，唔學飛一定死，學飛反而有生存機會，所以「識」（飛）者生存，「不識」（飛）者被淘汰。
在香港冇樓的人大多數非常聰明，當別人買樓時他們會提出警告，甚至引用一些評論員分析，認為香港樓市必冧，如果出現一些負資產者，他們會非常慶幸自己沒有買樓。
老實說，買樓的人如果太過進取，採用高成數按揭買樓，的確有機會變成負資產者，就好似一隻跌死小鳥，而這些事一定會發生，如果笨鳥唔敢飛，鳥類根本一早已經滅絕，如果大家驚變成負資產而唔敢買樓，根本不會有地產行業，買樓的人最初的時候會被人笑是笨鳥，但笑笑吓笑佢的人就唔識笑。
原刊於《明報》，本社獲作者授權轉載。
