在古時候，每當朝廷遇解決唔到問題，就會出皇榜，希望有能人之士揭皇榜，替朝廷解決問題，現在雖然沒有揭皇榜這回事，但如果政府遇到不能解決問題，亦應該禮下於人，請教有識之士，將問題擱置並不是辦法。
有老友以為我講垃圾徵費，政府搞到一塌糊塗，現在將問題擱置，將實施日期延至8月1日，在這日子之前幾個月，由政府各部門各自綵排，估計到最後都會得出一個結果，就是垃圾徵費是費時失事，暫時不會再討論垃圾徵費。如果政府咁樣做唔算是將問題擱置，反而是一個解決方法，在政府施政來說，應該是一大進步，否則「死牛一面頸」，夾硬推進垃圾徵費，最後會搞到一鑊粥。
我個人認為現在香港政府面對最大問題就是地產商唔買地，政府亦唔知點樣解決這個問題，唯有唔賣地，但這不是解決問題方法，因為唔賣地就會出現巨額財赤，以現在香港儲備，都唔捱得幾多年。所以，政府當務之急就是諗出一個方法，如何吸引地產商以高價買地。
要吸引有能力有需要市民買樓
上星期我與同事開租務會議，同事話有幾個單位「吉」咗，應該如何處理，我話按照「國際慣例」，租金少收一些，佣金畀多一些，問題就有機會解決，但如果有客要買，售價反而不能夠減少，否則寧願唔賣。
地產商點解唔買地，因為冇人買樓，所以，政府要做的事就是吸引有能力有需要的市民買樓，最直接的方法就是減印花稅。除了將各項辣招稅全撤之外，任何人買樓，只需要付現在一半的印花稅，為期3年，我敢肯定，如果利息下調，而政府又減印花稅，一定會吸引很多香港人以及外地人買樓。多人買樓，在地產商去庫存之後，就會打政府主意，甚至會公開要求政府恢復賣地，政府亦唔需要擔心會流標，有買地收入，財赤才有機會解決。不過，一定會有人反對，他們會話，將印花稅減半3年，政府會收少很多印花稅；老實說，他們講得絕對冇錯，不過政府從賣地、差餉以及地租收入，多過少收印花稅唔知幾多倍，做官口一定要大開大，只識斤斤計較的做唔到好官。
原刊於《明報》，本社獲作者授權轉載。
