樓價飈升，最大責任是政府唔肯提高土地供應，而是將責任推卸到物業投資者，繼而推出打擊樓市的各項特別印花稅，當時有人問我政府幾時會撤銷那些特別印花稅，我話冇一個時間表，直至政府出現巨額財赤，用盡所有方法都搞唔掂，唯有死死地氣撤辣，友人話咁樣即是打壞嚟醫。老實說，識醫還好，最怕藥石亂投。
政府見經濟情况壞無可壞，唯有半撤辣，政府以為在半撤辣之後，樓宇成交量大增，樓價急升，土地又可以高價賣出，官員反而要向那些要求政府出招，又唔希望撤辣的人解釋，但政府發夢都想唔到，在半撤辣之下，樓市繼續下跌，成交量亦大幅低於正常，地產商是頂級生意人，見到冇人買樓，又點會高價投地，甚至連投都唔投，政府賣地收入大幅減少，最低限度比預算少700億元。而政府見冇人買地，唯有暫時停止推出土地招標，無謂為疲弱樓市雪上加霜。所以，下一個財政年度賣地收入可能是零，政府為了彌補這個缺口唯有加稅。
倘加稅補財赤 苦了港人
港人北上消費，有政黨話這個問題很容易解決，就是開徵港人離境稅，唔准港人北上消費。老實說，提出這個建議的政黨影響力很大，而且又係生意人，官員對住那些議員簡直好似小學生，我雖然認為政府唔會推出港人離境稅，但難保政府在民意不足情况下，希望得到那些議員支持而開徵港人離境稅，咁就大鑊了，深圳一定配合香港政府而推出到香港離境稅，到時候真係唔知邊個傷啲？
有人又向業主打主意，叫政府開徵增值稅，如果事成就更加大鑊，既然增值稅都可以開徵，其他如遺產稅、銷售稅等就順理成章，香港由一個簡單稅制城市變成無比複雜，咁樣邊度會有人嚟香港投資？到時候，提出開徵乜稅物稅的人又會話唔應該開徵，然後又提出一大堆解決方法，最簡單就是拓闊稅基，加多啲稅，香港人就慘了。
原刊於《明報》，本社獲作者授權轉載。
