9月25日，兩年前，被加拿大扣押超過1600日的孟晚舟回國，兩年後今日，華為即將舉行新手機的發布會，為中國人爭返一口氣，但有人唔明白，點解華為要在雷蒙多訪問中國時突然公開推售華為Mate 60 Pro，唔等到今日才發布。
我相信華為是可以等到今日才推出，但可能雷蒙多咄咄迫人，又話要禁晶片，又話要禁高科技；既然已經可以自產，亦毋須顧及雷蒙多面子，而且打反擊戰是要講及最佳時間，如果到今日才發布華為Mate 60 Pro，有點賊過興兵感覺。就算我寫文章，都要貼住時勢，如果一個星期後才寫JPEX，搵人睇都難。
一般人講JPEX，都會以林作為中心，誰是幕後黑手、介紹人有冇犯法，但很少講點解班人咁蠢走去玩虛幣，最多就會話政府點解唔立法監管，既然唔出牌就要告經營者犯法。老實說，政府唔敢做，香港剛剛失去了全球最自由經濟體系，而且又是被新加坡奪走，如果香港對虛幣作出監管，或者又會被人再降級，所以，香港政府只是提醒大家JPEX是沒有牌，市民幫襯就貴客自理。不過，我相信香港政府不是放軟手腳，而是靜待反擊時機。
港府突出手 星虛幣大會推廣作用泡湯
政府突然採取行動，拉了11個人（編按：JPEX案至今已有12人被捕），停了JPEX網站，凍結6000萬元資產，帶出超過2000受害者，有13億元損失。至於點解政府會突然採取行動，其實，這是一個行動，亦是一個反擊。在行動期間，新加坡開虛幣大會，叫「TOKEN 2049」，有超過2000人參加，香港亦有虛幣KOL參與，但香港發生虛幣騙案，在新加坡參與會議的人又如何解釋，今次「TOKEN 2049」的推廣作用不但泡湯，並且有可能令到打算投資虛幣的人有戒心。香港雖然有損失，但政府如果唔採取行動，損失的人就會愈來愈多，但香港政府採取行動，損失最大的可能是新加坡。
不過，商場如戰場，香港長年累月被新加坡壓住，係時候作出反擊，但反擊時間亦極之重要，如果等「TOKEN 2049」開完會才對JPEX採取行動，相信效果會差很遠。
原刊於《明報》，本社獲作者授權轉載。
