一般人認為，孔子說「不患寡而患不均」是做人道理，我認為冇咁簡單，叫人早睡早起，勤力讀書，注意飲食是絕對正確的做人道理，係人都知，做唔做得到是另一回事，咁簡單的道理又何須孔子去教？
孔子美其名話有教無類，其實是收費老師，畀唔足錢只可以做旁聽生，有3000個咁多，畀足錢可以做入室弟子，只有72人，不均的情况嚴重，孔子冇理由咁失策，所以，我認為「不患寡而患不均」應另有解釋。
美歐縱再攻擊中國 口和心不和
在北約發公開信指摘中國威脅其他國家之後，在美國國慶之前，中國3間國航向歐洲購買292架空中巴士，波音一架也沒有，不患寡、只患不均的情况嚴重。波音公司及拜登當然唔開心，中國唔買波音已經是大件事，3間國航全部購買空中巴士更加大鑊！
很多人不明白，點解中國3間國航唔綠楊宜作兩家春，將購買客機數目平均分配給波音及空中巴士，令到歐洲同美國都咁開心。那些人不明白，這就是不患寡、只患不均的精妙之處。
孔子對3000個旁聽生說，不患寡而患不均是做人道理，對72個精讀生則可能會說，這是一條離間計，從來利益是最好的離間計。
今次空巴全勝，波音得個零，美國一定遷怒空中巴士搶生意，說什麼結盟都是信口開河，做生意才是最實際。老實說，今次空巴事件之後，美國與歐洲班大佬以後心中都會有條刺，就算大家共同發表一些攻擊中國的文章，都只是口和心不和。不患寡而患不均，離間計最高境界。
原刊於《明報》，本社獲作者授權轉載。
