星期三早上去茶餐廳，有一個客人問我是否得罪退休高官，佢發文嘲笑我賣自住樓，梗係唔掂，否則唔會賣自住樓。老實說，今時今日，我唔會話自己好掂，但又唔係唔掂，只能說並不是銀行迫我賣樓，而是我覺得兩公婆住5000方呎的單位，唔止浪費，簡直是奢侈。
高息下賣樓很正常
在高息環境下，賣樓是很正常，賣走之後搬去一個較細，但有煙火氣的單位，賣走之後收返億幾，咁都畀人笑，真係無奈，最無奈的是被一個從未擁有過物業的退休高官嘲笑，可能退休高官認為自己仍然位高權重，可以隨便嘲笑別人。
老闆話有很多退休公務員到茶餐廳食飯吹水，他們不滿意香港政府點解畀公務員宿舍給他們，一般公務員宿舍不但很大，而且環境又好，令到他們從不考慮買樓，蹉跎歲月，到退休時仍未買過一個單位，成為一件遺憾的事。
現實更悲慘，退休後要搬去一個細一半，環境差很遠的單位，不少退休公務員都話很難接受，所以，見到有人賣樓，尤其是相熟的人，不期然會發文嘲笑。
風平浪靜或都要賣樓
有樓的人賣樓是極之正常，唔好講現在是應銀行要求，降低借貸比率而賣樓，就算風平浪靜，樓價節節上升時都要賣樓，不過是將手上素質最差，收益唔好的物業賣走，我叫這個方法做「逢三退一」，但是很痛苦，因為賣走之後樓價大多數會繼續上升，唔傷心就假。
有很多一生未曾擁有過一個單位的人，其實他們的收入是不錯，但很可惜，由於有宿舍或房屋津貼，他們是唔會買樓，到退休之後仍然要租樓住，並且會比以前的宿舍細很多，他們的特點是嘲笑那些賣自住樓的人。其實他們不知道，別人亦嘲笑他們一生人未曾擁有過一個單位。
原刊於《明報》，本社獲作者授權轉載。
