2月26日香港《財政預算案》出台，坊間除了要求公務員減薪，收緊2元乘車優惠之外，亦有些少聲音要求政府派錢，原因是新加坡政府剛剛宣布了《財政預算案》，除了有370億港元盈餘之外，仲向每名新加坡市民最多派800坡元。今次真係「人比人，比死人」，估計香港財赤千億元，唔加稅已經算好，派錢應該無望。
有人叫我分析一下星港兩地的管理，點解新加坡可以有盈餘兼派錢，而香港有千億元財赤，派錢無望。我只能話，「他強任他強⋯⋯明月照大江」，星港兩地的經濟環境不同，香港能夠有現時的環境已經唔錯，正是各有前因莫羨人。
其實，香港人不應羨慕新加坡派錢，因為每次派錢之後，新加坡可能會加銷售稅，好彩今次派得少，估計加銷售稅的機會率不大。不過，現時新加坡的消費稅已經9%，再加就是雙位數，新加坡市民會很難捱。
如果香港政府開徵消費稅，不但可以連年派錢，而且赤字會大幅下降，甚至出現盈餘，我相信基層市民不會接受，有錢佬就無問題，沒有財赤，政府就不會考慮加稅，畀少少消費稅又算什麼。基層市民就唔同，以後用錢就要算過度過，所以，新加坡派錢又使乜羨慕，新加坡市民有苦自己知。
其實，新加坡政府想取消消費稅都不可能，原因是有大約萬億美元國債，今年只有370億港元盈餘，根本唔夠還息，唯有好似美國一樣不斷發債，實行以債冚息，否則就會出現赤字，仲要在適當時候加消費稅以彌補國債利息支出。不過，在加消費稅之前一定派錢，所以，香港人點解要羨慕新加坡派錢？
原刊於《明報》，本社獲作者授權轉載。
