語不驚人死不休，無非為咗博眼球。
一知半解最危險，近年最常聽到的謬論就係香港打工仔、中產人士置業平均需要「不吃不喝」19年、21年、甚至22年先至上到車買到樓。這類言論每次都會被廣泛報道，簡直有如另類感官世界，足以令聞者揪心，聽者震驚；未上車者亦肯定會被此等言論嚇至面容扭曲。要譁眾取寵，倒不如說香港年輕人要上車只能發夢或海市蜃樓更直接。
歪理唯恐天下不亂
根據瑞銀早些時候發布的《全球房地產泡沫指數》報告中指出，香港樓價已回落至2012年水平，打工仔平均卻依然要不吃不喝、儲足22年錢才能置業，新加坡則平均只需10年。即使買樓收租亦要39年才回本。市場長期瀰漫悲觀情緒，惶惶不可終日，年輕人感覺前景暗淡，甚至有人會質疑父母點解未問准就帶佢嚟呢個世界，點解父母咁唔孝順、未有幫佢俾首期甚至一炮過幫佢上車。誰之過？完全都係因為一層樓，就要質疑自己投錯胎，唔明自己點解唔係富X代。最終將只會導致兩種極端情況，一係有人會鋌而走險，一係有人索性躺平，反正有前途亦冇希望。原來一切的扭曲思維和歪理，皆源於一些唯恐天下不亂並違反邏輯推理的謬論。
這裏所指的違反邏輯思維謬論，就係分析師筆下的所謂「不吃不喝」。儘管只屬比喻性質，卻偏離現實。真的不吃不喝，怕你捱不到第一個月已一命嗚呼，何來還有機會上車，難道連陰宅亦被納入研究之列？！現實是，以呎價計，陰宅每每較陽宅更揦脷；夾硬拿香港跟新加坡比，亦無異於用蘋果來跟橙比。
另一種謬論，就係大行對上車盤面積的堅離地假設。彈丸之地的香港，竟然以650方呎作為基本上車門檻的分析基準，簡直堅離地，更儼然是何不食肉糜的變種版。香港打工仔首次置業上車族一般只會選擇實呎300至400方呎，甫上車就揀650方呎，將不可能變可能，大衛高柏飛都怕且未必幫到你。早年亦曾經有新晉專業人士指自己買不到中區私樓，未能成功上車，直指香港樓價貴到飛起，謬誤係，點解上車一定要揀市區樓？
今時今日，牛鬼蛇神歪論鋪天蓋地。遇上涉及多重謬誤的言論或分析，不知者嚇死知者笑死，少一點獨立思考式能力或不加思索照單全收，隨時誤墮思維陷阱。
原刊於《am730》，本社獲作者授權轉載。
