上世紀70年代有「置地飲牛奶」， 21世紀的今天就有「楊協成飲維他奶」。等了足足半個世紀，歷史才再重演，唯總不會一模一樣。香港股民也許長期被宰割，慣了損手爛腳，部分出現了驚恐症候群，升又驚青，跌又騰雞，對市場失去了信任，更遑論奢望自己有生之年可戰勝市場，更多已成驚弓之鳥。股價一旦突然爆升，都會被陰謀論批判為股東減持先兆？
大股東有份炒高股價？
食花生者多，懂得分析形勢者卻欠奉，唔知頭唔知路者最愛各自解讀，錯判形勢偷換概念比比皆是，單邊思維只係記得單一事件，對上市公司經營面貌卻明顯漠不關心，立場先行。記得我地早幾年股價由16蚊炒到上40幾蚊，反而係6年前有報章財經版大肆報道，內地無厘頭傳聞有網民惡搞潮語順口溜：「維他檸檬茶，爽過吸大麻」令維他奶爆紅，出現搶購潮，殺入最受歡迎外賣飲料十大之列，令股價火上加油，一切均有如劇本情節。
有網民會認為，當年大股東夾埋基金佬去炒高股價，問題係如果上述懷疑係事實，大股東又怎會在業績發布會上唱衰自己股價。還記得嗎？話說直至2019年於公布全年業績時，執行主席羅友禮開宗名義認為之前股價升得太高，並形容為天文股價覺得唔舒服，股價回落才正常。
好戲在後頭
坊間有人會認為早年因楊協成家族內訌，成功收購的信和黃志祥巴打志達食過番尋味，透過家族辦公室增持自己維他奶，睇準中港市場潛力，然而未買夠一成即獲大肆報道，係小題大做。其實熟悉香港股市沿革的股壇老將反而不會水過鴨背，視之為小事一樁。無端端有人密密從市場吸納至持股超過5%，即已到達須申報水平，擺到明打草驚蛇，意欲何為明眼人不難想像，到今天更已超越一成股權，肯定好戲在後頭。
正如當年維他奶股價被喪炒高至近百倍市盈率時，大股東可以出口術叫大家理性，壓低股價近乎自殘，今時今日當股價被外人由4蚊掃到上11蚊，除非自己闊佬懶理，對盤生意意興闌珊，為防外敵入侵，最簡單操作莫過於攤薄外方股權，大比例供股，可能係最簡單直接的抗敵武器，後知後覺的好友小心損手。
原刊於《am730》，本社獲作者授權轉載。
