近日有傳聞中央政府會出招救股市，令到內地有不少年輕人借錢入市，但中央救市措施遲遲未有行動，股市在失去動力之後先升後跌，不少年輕人在未試過贏錢之下輸了很多借番嚟的錢，不少人笑那一班年輕人被「割韭菜」。
可能我自小在澳門長大，所以有不同觀點，我認為那一班一賭即輸的年輕人是家山有福，現在即使輸了錢，大多數是可以承受，甚至父母都可以幫忙，本身又沒有兒女，輸了錢兩三年之後又是一條好漢。但如果畀那班年輕人贏了錢，只會愈賭愈大，到輸錢的時候連命都輸埋，所以，一賭即輸是福大命大是沒有錯。
如果中央政府真的是出手救市，那一班借錢入市的年輕人一定會贏到開巷，而且仲唔識得收手，如果有長輩或者其他人勸他們股市如估市，應該見好即收，就會畀他們鬧食不到的葡萄是酸的，並且以自己的戰績作證明，試問勸他們的人仲有乜嘢可以講，直至股市下跌，出現大時代式終結才可以令那些年輕人對股市望而卻步，但已經是太遲了。
今次就算中央政府唔救市，都唔會出現大動亂，但倘若中央政府救市，令到不少人在不用動用自己資金下收穫不菲，只會愈賭愈大，股市下跌就叫政府救市，如是這樣試得三幾次，股民對政府有倚賴性，認為就算股市下跌，只要向政府施壓，政府就會救市，更加放膽投資股市，終有一日，中央政府是不會救市，就算想救都無能力救。到時候，股民包括近日入市的年輕人，就真真正正被人「割韭菜」，最壞的情况甚至會出現動亂，我唔相信中央政府是不知道有這個後果，所以，即使救市，只會在政策上，而不會真金白銀救市。
原刊於《明報》，本社獲作者授權轉載。
