我的生意是投資物業，而大多數時間亦睇好樓市，不過，我會在樓市最好的時候賣走一些物業。很奇怪，當我買樓的時候，有不少人會同我講樓市不太穩定，叫我睇定啲先買；但當我賣樓，他們又會問我，既然話樓市咁好，點解要賣樓，話我口不對心。
其實，他們並沒有仔細睇下我賣什麼貨，我所賣走的物業，在市場上未必很差，但在公司資產裏面應該是屬於最差的一個組別，那些物業只會在樓市最好的時候才可以賣走，而所得資金可以在樓市轉淡時買到更多更好的物業。如果唔趁市旺賣樓，到了樓市轉壞，銀行追數，就要被迫賣走一些優質物業，這個理論叫「逢三退一」。
馬斯克裁員才能夠請新人
大家千祈唔好以為這是一個新理論，無論是做生意或辦學校，這個理論已用了很久很久。做生意的人會在市况最壞時候裁減一些不適合而工資又高的員工，同時亦會招聘更多更優質，人工又不是太高的員工；辦學也是一樣，名校升班試目的是淘汰一些未及資格的同學，同時亦向其他學校招收成績優異的學生，逢三退一是好使好用，不過有時大家用咗都唔知。
有人話「電車佬」馬斯克口不對心，剛剛話經濟唔好要裁走10%員工，但立刻表示要請更多員工來迎接經濟復甦；其實，馬斯克這樣做也是逢三退一，唔裁走一些冗員，又點會有空缺給予新人？而且，當裁走冗員時，對仍然在職的員工是一種推動力，是一舉兩得。馬斯克是世界首富，一定是一個非常精明的人，在淡市裁走一些冗員亦是精明生意人做法，點可以話佢口不對心。
原刊於《明報》，本社獲作者授權轉載。
