Taylor Swift在新加坡開演唱會，早已曲終人散，但很奇怪，過了咁耐，除了新加坡人大讚之外，仍然有演唱會非常成功的消息，有大學開班探討Taylor Swift點解咁成功，甚至Taylor Swift「未婚夫」都讚新加坡「棒棒棒」，令人覺得很肉麻。香港政府無論做得幾好，都只會畀人鬧，唔會有人讚，其實使唔使咁着迹，講得太多反而被人覺得是替新加坡賣廣告，弄巧成拙。
有新加坡學者話，Taylor Swift在獅城搞東南亞獨家演唱會，新加坡政府雖然贊助1800萬美元，其實物有所值，除了可以為獅城帶來5億美元經濟效益之外，仲可以有廣告效益，比向全球做廣告都有效。獅城學者咁樣講，令我質疑Taylor Swift演唱會未必達到預期的經濟效益，所以話當廣告費都抵。事實上，新加坡攞了咁多世界第一，全世界認識新加坡的人多過中國，仲使乜做廣告，千祈唔好以為學者的廣告效益概念很新潮，早在戰國時代，四公子之一孟嘗君的食客早已做了。
星獲多個世界第一 不用賣廣告
大家都知道，孟嘗君有食客三千，終日無所事事，孟嘗君叫其中一個食客回到他的封地收欠債，並且叫食客順手買一些他缺少的東西，當食客去到之後，被封地債仔捧上天，感覺自己有無上光榮，於是一聲「燒數簿」，將債仔的欠債單據燒了，返到去對孟嘗君講：「主公，你什麼都有，只欠一個義字，所以將數簿燒了，等封地債仔知道你是有情有義的人。」孟嘗君心裏亦「燒數簿」，真係有苦自己知，收不到債又點可以養咁多食客，不過唔燒都燒咗，當時可能會話區區欠債，當賣廣告都抵。由此可見，當有人做生意最後話「當賣廣告都抵」即是蝕了錢。
原刊於《明報》，本社獲作者授權轉載。
