編按：由著名編劇莊梅岩撰寫的舞台劇《最後禮物》，故事圍繞一對闊別多年的兄弟──歐陽晴和歐陽曦，因為父親的離世聚首一堂。但重聚只帶來情感翻騰，將積累多年的怨懟和嫉妒盡情宣洩。
作者借此詰問，如果清官難審家庭事，那麼原生家庭的愛恨和虧欠，到底可以由誰審判？鑑於第5波新冠疫情爆發，原訂1月至2月公演的舞台劇被迫延期，但劇本已率先出版，本社獲天地圖書授權轉載序章，以饗讀者。
【黑暗中傳來短訊的打字聲和發送聲，聽得出發送者字打得很快，並清晰地知道自己想說的話。】
【燈漸亮，商業大廈的電梯大堂，歐陽曦一面等電梯一面在手機上回訊，他樣子沉着，有幾分威嚴，一身樸素打扮，但難掩高尚氣質。此時音訊傳來，他按鍵收聽，是一位男聲】
畫外音：唔係呀歐陽，依家佢唔畀啲裝修師傅繼續做呀，第二期條數又未找，佢話同你之前畀佢睇隻色唔同，我話小姐，肉眼睇唔準㗎，你對返個冧把──
【未播放完歐陽曦已把它停住，並迅速回訊，話音再傳】
畫外音：個client唔係想走數嘅，佢搵唔到你又淨係信你，想你親自交代吓啫⋯⋯
【歐陽曦快速回鍵，沒注意一老太太已慢慢走近】
畫外音：我知你搞緊白事，我唔係要你返公司，我淨係想你打個電話安撫吓佢啫。啲客like你，你講一句勝過我講10句──再唔係你send個voice message過嚟，我播畀佢聽，佢聽到你把聲就開心──
【歐陽曦察覺有人，將音訊停住，然後平靜地錄口訊】
歐陽曦： 你叫佢等收律師信啦。
【歐陽曦將手機調至靜音然後放於袋中。此時電梯到達聲響，燈光轉變，二人進光區。】
【曦先按樓層，見老太太盯着自己】
歐陽曦：幾樓呀？
老太太：同你一樣。【稍頓，老太太忍不住再看他】睇你咁後生，怕且唔係嚟立遺囑？
歐陽曦：唔係。
老太太：咁即係嚟領獎──呢間行專做遺產。【曦牽強一笑】父母？你父母應該同我咁上下年紀，搵華叔呀？
歐陽曦：係，馬律師同我爸爸識咗好多年。
老太太：我哋同華叔都識咗好多年。我老爺、我老公，依家輪到我，我哋份平安紙都係搵佢搞⋯⋯華叔好呀，經驗老到、做嘢細心，最重要係個人心地好、夠正派⋯⋯【燈光轉變，電梯到達。歐陽曦讓老太太先行，老太太走了幾步，復停下來】唔好怪阿婆多口問句：你有冇45歲呀？
歐陽曦：⋯⋯48。
老太太：⋯⋯嗯，我估都係咁上下。
歐陽晴：有咩可以幫到你？
老太太：恕我唐突⋯⋯我想問，你依家心情點呀？我個仔同你咁上下年紀，頭先我一路望住你一路諗，過兩年我走埋，我個仔就會好似你咁，企喺樓下等，行入嗰度門，然後坐喺入面聽華叔讀我份遺囑，唔知嗰種心情係點㗎呢？
歐陽曦：我唔識答你。
老太太：唔駛唔好意思㗎，先人留畀你最後一份禮物，依家就入去拆，係咪多少都會有啲開心呢？沿途有冇諗返起你父母咁呢？真係可惜呀呵，送份禮畀人，但係你永遠唔知佢收到嗰陣有咩反應⋯⋯
【歐陽曦看着老太太，知道她一定有苦衷】
歐陽曦：駛唔駛搵人陪你入去？要唔要我幫你打畀個仔？
老太太：我哋已經好耐冇聯絡。【稍頓】我得一粒仔，同伯爺公辛苦咗幾十年，供書教學，咩都畀最好嘅佢。到頭來一句唔如意，就搬走咗，嘈多兩句，連佢老竇過身都唔返嚟⋯⋯【老太太悲從中來，忍不住哭泣，歐陽曦連忙遞上紙巾】有乜咁血海深仇？連佢最後一面都唔見？吓？唔嚟送佢最後一程？我唔會原諒佢㗎，我話過，佢夠膽唔送佢老竇終我就一毫子都唔分畀佢──佢恃住我哋得佢一個！佢以為我一定要將啲嘢留畀佢！佢錯喇，我就係一個崩都唔分畀佢！我今日一定要改過份遺囑，等佢嚟到打開一睇，晴天霹靂，一個仙都冇，佢老竇老母儲咗成億身家，但係一個崩都唔分畀佢⋯⋯
歐陽曦：既然你決定咗，佢心情係點都唔重要啦。
老太太：但係我想知！我想親眼睇到！我想睇吓佢會唔會後悔、後悔冇聽我話，後悔冇關心吓佢老竇⋯⋯
歐陽曦：到你真係睇到，可能你仲傷心呢。
【老太太努力平伏自己】
老太太：唔該晒你呀後生仔，我冇嘢喇，你去啦。
歐陽曦：你唔入去喇？
老太太：我喺呢度唞唞先，唔係一陣華叔又話我唔夠冷靜，唔畀我改。
歐陽曦：OK。
老太太：⋯⋯多謝你。你老竇老母有福，我一睇就知你係乖仔，放心啦，我冇嘢，我等陣就入去。
歐陽曦：咁我入去先。【歐陽曦走了幾步復折返】無論你決定點做，唔好隨便同人講自己有幾多身家，呢個世界好複雜，尤其牽涉到錢銀。
【歐陽曦下，燈光轉變，人來人往的律師樓】
原刊於《最後禮物》，本社獲天地圖書授權轉載，題為編輯擬。
新書簡介：
書名：《最後禮物》
作者：莊梅岩
出版社：天地圖書
出版日期：2022年2月
