上星期很多人問我，既然對樓市有信心，點解要賣一層高層甲級商廈，我其實係唔想賣，不過代理同我講，市場上完全見唔到一層甲廈出售，只有一些低層、「發了水」的單位出售。由於是「發了水」，做成樓價偏低，而測量師又會因應成交價而作出估價，銀行向持有商廈的業主追差價，在火燒連環船下，甲廈樓價兵敗如山倒。
我有點奇怪，香港重返紐倫港，代表香港商廈需求強勁，但市場好似反應唔到，其實都唔算反應唔到，中環核心區的甲廈空置率已經下跌，但傳媒沒有提及，令到大家都以為甲廈價格大冧。
高層甲廈售價高一成 其他業主不會平賣
行軍打仗，當自己軍隊潰敗，最需要是一個持旗手，在亂軍之中豎起軍旗，如果軍旗不倒，士兵就會回復信心，向軍旗方向靠攏，最後會作出反攻。我於是揀了一層全部租出高層甲廈，按代理計算，樓價略高於其他甲廈單位一成，但全個中環，除了中環中心，都搵唔到一層高層甲廈放售。
這個要價其實是很克己，其他業主見到這個售價，又點會平賣自己單位，否則就打開肚皮話畀其他人知自己等錢用，只要我們不平賣，就好似軍旗一樣，軍旗不倒，甲廈不倒。
代理話，如果賣走之後，甲廈會不會失去方向？我話不會，因為我又會豎第二面軍旗，攞另外一層高層甲廈放售，不過售價就要提升一成；如果又能夠賣走，在兩點成一直線理論下，甲廈形勢應該可以企穩，冇理由做返紐倫港，本港甲廈需求反而減少。
原刊於《明報》，本社獲作者授權轉載。
