經濟學第一課：Demand & Supply，有價有市，幾時都係價先行，定價係藝術，市場永遠是對的，個價定得啱唔啱，市場反應係最佳答案。在息口高企經濟環境未明顯改善情況下，市場早已不再腦發熱，此時此處，有價有市，關鍵肯定在開價策略。
「樓神」趙國雄在開盤宣布首張價單前，講到明成本價每方呎要2.8萬元，姑勿論呢條數有幾多成係水分，正所謂Location Location Location，港島南區本來就應該有溢價。最終竟然定了一個震撼全城，兼嚇窒同區其餘新盤期數的「撈底價」，激發起香港地久違了的發展商賣大包，準買家爭相搵着數的行為心理，自然有價有市！
周末可見，長江實業集團（1113）黃竹坑站上蓋Blue Coast銷售情況果如所料熱辣滾燙，共套現接近75億元，尤其本地用家及家庭客佔過半數，內地客只佔約三成，皆因此盤屬較切合香港口味及換樓需求的三至四房戶型，反映香港人家底厚實力強，對本地樓市止跌回升的趨勢具更強指標作用。
港府為樓市全撤辣 買家重燃希望
長實向來是起樓工廠，追求貨如輪轉，鮮有捂盤惜售，資金回籠最實際，價量齊升的風光日子，有價求價有量求量最實際。長實銷售策略從來都務實且緊貼市場，少有吊高來賣大玩試探，追求一擊即中。
曾幾何時，長實賣樓曾經出現因應市況不穩愈賣愈平，今趟適逢香港政府全撤辣，集團見向隅者眾，即溫和加價加推單位，趙樓神更強調仍未到成本價，令準買家有感自己搵到超人着數，而沾沾自喜甚至心花怒放。能成功加價加推，反映香港樓價終於築底，且隨着經濟同步見底，樓價回升可期，配合同盤以長實可供發售單位最多，成功為樓價築底，為買家重新燃點對樓市回穩的希望，為未來即將陸續開售新盤鋪路，反映今天的開價屬有遠見之舉。
香港之所以能成為國際金融中心，全賴自由市場配合包括低稅率和簡單稅率的元素。可惜近年買樓辣招走火入魔，窒礙市場正常運作。今年的財政預算案，港府終於撥亂反正為樓市全撤辣，讓市場回歸自由，讓用家自由意志量力而為，讓投資者為個人投資決定負責。
正如中文大學經濟系副教授莊太量所指，樓價在撤辣後從低位反彈約2%至3%，抵銷年初以來的跌幅，升勢已經形成，相信樓價會跟隨經濟和通脹回升，加上本港過去10年積存了不少購買力，預期幾個月內成交達兩萬宗不是問題，賣家其後亦可能會逐步加價。
原刊於《am730》，本社獲作者授權轉載。
