近日主力牆事件搞到全城風雨，或者大家可能唔相信，真的有不少業主是拆了主力牆，尤其是單位內的主力牆。
本來，拆室內主力牆亦不是什麼大不了的事，最緊要獲測量師核准。但如果經測量師核准，不但要用一大筆錢，有很大機會不會獲得批核，所以有不少裝修公司便膽粗粗自己拆了主力牆，業主未必知道，只覺得裝修公司很本事，替他們慳了不少錢。
有老友問，香港樓市有冇主力牆。老實說，幾乎是風馬牛不相及，不過，香港樓市的確有主力牆，如果這幅主力牆不冧，樓市不會冧，關鍵是香港政府是有能力拆了這幅主力牆，亦唔係未試過，開徵特別印花稅的時候首先向豪宅埋手，好彩拆唔郁，否則香港樓市大冧。或者是我錯了，香港政府認為樓市大冧才是市民之福。
講咗咁耐，老友有多少不耐煩，問香港樓市主力牆究竟是什麼。一般人認為是小型單位，其實唔係，是豪宅。最近雖然有不少劈價蝕讓報道，但中原指數竟然連升三周，升了大約2%，主要是有不少豪宅以高價成交。大家可能唔信，豪宅不死，香港樓市不死，因為每一個豪宅都會提供不少就業機會，一級寫字樓以及名店食肆亦會受惠。如果香港學新加坡，對豪宅業主打重稅，甚至唔畀非香港人買豪宅，就等於拆了香港樓市主力牆，冇有錢人來香港定居，豪宅死，香港樓市亦死。
原刊於《明報》，本社獲作者授權轉載。
