以下是一篇「假新聞」，純屬虛構，切勿當真，更不要對號入座。認真你就輸了。
記者：司長，點解你屋企會有僭建？
司長：我真係好忙，冇留意間屋嘅情况，亦都無為意，我喺度鄭重向市民道歉……
記者：其實你已經道歉咗好多次，呢次請你嚟係做訪問，唔係嚟道歉。你除咗係法律界精英，仲係工程師，點解會唔知自己間屋有僭建？
司長：我真係好忙，我想向市民……
記者：得、得，司長。不如你講吓，點解你會咁忙嘅？
司長：大家都知，我有好多公職，人稱我做「公職王」，我業務又忙，處理好多仲裁case，多到加入政府時都未做完，又要飛來飛去……係好忙。
記者：你忙成咁，買咗間大屋之後，其實有冇入去住過？
司長：有啊。
記者：你自己住間屋，唔通無四圍行吓，了解吓間屋有乜設施？間隔係點等等？睇吓睇吓，如果發現原來有個地庫、屋頂多咗間房……會唔會懷疑呢啲「多出嚟」嘅地方，其實係僭建呢？
司長：我想重申，當年我係好忙。
記者：你忙成咁，會唔會買咗間屋之後，唔記得地址，唔識得返屋企？
司長：又唔會，我有司機嘛。
記者：咁咪係，你唔記得，司機記得咪得囉；僭建嘅嘢，你驚唔記得，搵個專業人士幫手咪得囉！
司長：我「無為意」……
記者：你而家更忙，仍有幾單仲裁個案係手，會唔會有啲大事「無為意」，會做漏咗，例如唔記得DQ（取消資格）班本土派、獨派候選人？
司長：放心，我係法律專業人士，呢啲嘢點會唔記得。
記者：講專業，司長其實對僭建問題都係專家，寫過書，又做過僭建審裁主席，處理過唔少有關僭建上訴，對乜嘢係僭建應該好了解。點解對自己住的地方反而「無為意」到？
司長：僭建審裁真係好忙，你知香港幾多僭建。做呢個位，係忙到不得了。
記者：如果有人上訴，話僭建物冇拆，係因為忙、唔記得，政府唔應該罰佢，司長你接唔接受？
司長：要睇情况，不能一概而論，你可以參考我本書。
記者：如果唔記得交稅，或唔記得交違泊罰款，可唔可以用「太忙，唔記得」做辯護理由？
司長：我覺得你係度質疑我，多過係做訪問……
記者：咁，我哋不如轉個話題。有報道話你間大宅做按揭時，並沒有交代地庫、天台等僭建，令銀行估值低咗，涉嫌詐騙。請問司長點回應？
司長：其實咁就證明我真係唔知有僭建。既然唔知，又點會做按揭時寫埋入去呢？有人認為我係存心呃銀行，但我真係唔知有僭建，點會係呃佢哋。
記者：咁講，如果唔係新聞界用衛星圖片、查契、用無人機高空拍攝，找出你間大宅有僭建，你可能到而家都未知喎，係咪？咁你會唔會向新聞界講聲「唔該」呢？
司長：我係忙、「唔為意」，我向市民……
記者：司長，唔使再向市民道歉啦。市民又唔係屋宇署，亦唔係你上司。佢哋只係想知，你仲係咪有嘢未交代？仲有冇啲嘢收埋？
司長：我會全力配合、開誠布公……
記者：咁你仲有幾多間大宅？記唔記得有冇僭建？你唔使驚唔記得，只要公開大宅喺邊，新聞界自然會做嘢，幫你找出有冇僭建物，唔收錢㗎。
司長：有關我私人嘅嘢，我唔想再答。可唔可以問返啲公務嘅嘢？
記者：好，請問司長有冇後悔加入政府？
司長：冇，我預咗任務會好艱巨。
記者：你仲有6單case係手，尚未全身投入新角色，點知任務有幾艱巨？
司長：我負責守護香港法治，責任重大，當然艱巨。
記者：咁點解你唔做好晒手頭啲case至加入政府呢？兼做咁多嘢，又會令你好忙。
司長：點解咁急請我，你要問我老頂。
記者：你老頂話，希望大家包容。但立法會班友就唔係咁諗，佢地要你去議會解畫。你話要做準備、好忙，月底至去。但唔去議會，卻走來接受專訪。你唔怕得罪班民意代表？以後會更加留難你。
司長：我去立法會唔係解釋僭建，係去回答法律的問題。做專訪，係想向市民解釋。
記者：只係接受我哋一家專訪，淨係向我哋解釋，你唔怕激嬲其他傳媒？
司長：我係法律專家，唔係傳媒專家，「無為意」到呢個問題。
記者：好，咁我就祝司長好運啦。多謝你。
原刊於《明報》，獲作者授權發表。
