有老友話真係唔明白，的士行業要求加價，起表由加5元開始，以後每跳加兩毫，認真「濕濕碎」，估計一定會通過，因為現時不少人叫Uber，車費多的士一倍至兩倍以上，他平時坐Uber返工，大約200元，如果坐的士，表價只是80元。換句話說，Uber搶了不少的士優質客戶，的士業應該要求政府取締Uber，而非加5元咁小兒科。
我問老友，如果返工時有一架的士只收150元，佢會唔會坐，老友話一定坐，因為坐Uber要200元，除笨有精，我話這就是有人唔要求政府取締Uber的原因，不但有利的士提高收費，而且令畀錢的人非常開心，蘇彝士運河的收費亦有類似情况。
近日由於以色列狂炸加沙的哈馬斯，同樣是穆斯林的也門胡塞武裝組織襲擊途經紅海的商船，蘇彝士運河航線受阻，一般人以為當商船如果要繞經南非好望角，油費將會用多很多，航運費一定會大幅加價，但後來發覺航運費並沒有預期般大升，反而是保險費加了不少，老友認為商人唔會做蝕本生意，究竟點解可以唔加價？
Uber搶優質客 的士業不應只要求加價
老友可能唔知道，在蘇彝士運河通航以來，收費是非常之高，船公司就會計數，當油價在低位就會繞經好望角，高企時就會用蘇彝士運河 ，令到運河不能物盡其用。運河管理公司收入減少，後來，通過蘇彝士運河的費用與油價「掛鈎」，假設當一艘商船繞經好望角要100萬美元燃油，蘇彝士運河的航運費大約是80萬元；換句話說，通過蘇彝士運河的費用幾時都比繞經好望角平些少，所以，很少商船唔用蘇彝士運河 ，除非太大通過唔到。
的士也可用這個方法來提高車費，一個人如果坐Uber去某個地方要200元，即使正常的士費只需付80元，他們亦唔介意畀150元；換句話說，Uber可以是的士「收費指引」，這亦是有人不要求取締Uber的最大原因。
原刊於《明報》，本社獲作者授權轉載。
