網上流傳BBC 慶祝中國農曆新年的食譜圖片，誤將吉儀當利市，金銀衣紙當餐巾，以喪禮的物品慶祝中國新年，不單止是歧視，甚至有侮辱之嫌。BBC 立刻刪除有關照片，但沒有即時道歉；講有關圖片是由一個香港移民設計，將責任推得一乾二淨，那位香港移民就要硬食這隻死貓，不過就冇辦法，鬼叫自己寄人籬下。
就算冇香港人食死貓，講得兩講，BBC 又會話中國人太小氣，唔開得玩笑，輕輕帶過，又係中國人唔啱，就算以後發覺，新疆沒有種族滅絕，歐美等國家都不會認錯，最多只是話那些流亡海外新疆人畀錯資料，千錯萬錯都是那些人的錯。被指摘的人不會反駁，始終都是同一句，寄人籬下，根本沒有發言的權利。
有老友質疑我，點解咁肯定那位香港設計師是孭鑊？
理由很簡單，BBC在農曆新年前發布這幅圖片，有鼓勵歐美人士在農曆新年期間，送喪禮用的吉儀給中國人拜年，中國人收到亦唔能發火，最多只是話外國人唔知道吉儀是在喪禮才會用。不過，如果有中國人或者香港人設計，一定知道送吉儀畀人代表家有喪事，收到的人會話節哀順變，真的是很大件事，所有中國人都知道。
所以，在設計賀年用品時又點會用上吉儀，或者，那位香港設計師用反間計，借力打力，令到BBC發錯信息，所有送吉儀的外國人都變成家有喪事，今次BBC真係偷雞唔到蝕渣米。
由此可見， BBC 根本唔了解中國的文化習俗，見到新疆維吾爾族人努力生產，改善生活，學習漢語，立刻企出嚟話強迫勞動，種族滅絕。老實講，現在大家都知道那些是政客說話，不過，又不能不反駁他們，否則講100次之後就會變成真，就算以後發覺並沒有種族滅絕這回事，歐美國家又會話，如果不是真的，點解當時唔反駁？
原刊於《明報》，本社獲作者授權轉載。
