樓市出現一個非常奇怪現象，就是大家明明知道有不少內地人在香港買樓，新樓盤的買家大約有六成是內地人，這是一個非常正面的信息，點解在這個有利情况下，不少香港人賣樓？如果那些人因為有大錢賺而要賣樓就無話可說，但現在是賣樓的人不少是蝕錢，而且仲蝕得好勁，真係有多少不明白。
當然，如果賣樓的人是移民離開，根本不用解釋，但現實是那些人在賣樓之後要租樓住，就算不是售後租回，但都會租其他單位，既然要畀租金，點解唔用嚟供樓，或者供樓所用的錢是比較多，但亦未至於要蝕錢賣樓。如果日後要再買樓，所花費用包括印花稅等，夠付幾年租金，仍然要賣樓，一定有一些不為人知理由，報紙只是報道蝕錢的金額，並沒有報道那些業主賣樓理由。
賣樓人大多高成數按揭 還唔到錢
有財務公司老友同我講，現在賣樓的人大多數採用高成數按揭，或者將物業加按又加按，根本還唔到錢，眼見利息咁高，不如將物業賣走，既可以解燃眉之急，又唔使付咁多利息，如果日後有機會再買樓，日後先算，而且租樓一定平過畀高息。
有人話，香港有3.2萬個負資產，那些人蝕錢都要賣樓，樓市有排跌。大家可能搞錯，負資產的銀主都唔想業主蝕錢賣樓，因為所蝕的並不是業主的錢，而是銀主的錢，銀主只是希望業主繼續供樓，就算還息不還本都可以。所以，負資產業主是不會蝕錢賣樓，他們都希望有翻身的一日，老實說，我到現在都搞唔清，如果業主不是財務問題，現在點解要蝕錢賣樓。
原刊於《明報》，本社獲作者授權轉載。
