有老友租用的舖位業主因為等錢用，以低於市價叫價，希望老友可以買下租用的舖位，但老友一家將會去旅行，回覆業主話待他們回港之後再考慮，老友業主於是問我有冇興趣。老實說，我覺得雖然未至於是一個筍盤，但價錢不貴，而且老友做得唔錯，交租準時，買入亦是一個好投資。不過，想到有可能與老友反目，倒不如先問一問老友有冇興趣，冇興趣我再考慮。
我知道老友是有興趣的，不過要同老婆去旅行，待他們回來之後再買，於是我請老友兩公婆食飯，並且叫人從澳門帶了一底禾蟲給我。席間我同老友講，禾蟲是很短造，相傳有一個剛剛死了老公的文君新寡，在守夜當夜，聽到有小販叫賣禾蟲，竟然買禾蟲做宵夜，有人話佢不守婦道，文君新寡話「夫死夫還在，禾蟲過造恨唔返」，佢老公遺體唔會唔見咗，今晚唔食禾蟲，可能要等明年才有得食。
不少業主等錢用 需賣走一兩個舖
現在有不少業主因為等錢用，而要將手上部分舖位賣走，只要能夠賣走一兩個，便可以解決問題，其他可以不賣。所以，老友的業主只要賣走其他舖位，就唔會賣老友租用的舖位畀佢，於是我同老友講，旅行幾時都可以去，就算今次臨急臨忙取消，最多只是損失一些手續費，隨時可以再去旅行，但如果唔買下租用的舖位，可能一世都買唔到，正是「夫死夫還在，禾蟲過造恨唔返」。
原刊於《明報》，本社獲作者授權轉載。
