編按：今年是香港房屋協會成立75周年，房協編印的《房協75周年紀念特刊》，記載了75個與房協發展丶人物丶和未來有關的有趣故事。本社獲房協授權轉載歌星郭富城的故事，以饗讀者。
1. 你什麼時候住在明華大廈？由幾歲開始居住？
答：我由出生開始，已經在明華大廈居住，大概住到20歲左右，因為工作關係，才搬出去外面居住！我和家人一家住在第21座四樓！在明華大廈生活的20年，生活上物質上都絕對不富有，一家七口，父母和兩個哥哥、兩個姐姐及我，住在一個400呎單位，是有點擠，但卻是我成長歲月中，最開心的一段時光。
2.可以形容一下你印象中的明華大廈是什麼模樣嗎？例如居住單位、屋邨環境、設施、街坊鄰里等。
答：我印象中的明華大廈非常有趣，因為只有單數座數，而沒有雙數座數的，即是只有1、3、5、7、9到25座（即阿公岩道1、3、5、7、9到25號，順序等於明華大廈的M、L、K、J、I到A座）！大部分九層高，有啲有嘅，但係我哋班細路鍾意行樓梯，走上走落冇時停，總之就坐唔定。明華大廈的設計頗特別，座與座之間一定有片小空地，我們一班小朋友常常在空地踩單車，有時直接踩去後山的山坡玩。而樓下的空地設施也不錯，有乒乓波枱、滑梯、和氹氹轉！當時鄰舍之間關係非常融洽，所有小朋友一放學後，做完功課就聚在一起玩，最鍾意踢西瓜波，特登由四樓踢落樓下，畀藉口自己走來走去，想落樓執波。至於我自己好鍾意響走廊踩雪屐，有一次唔小心跣倒，流晒血，仲縫咗好多針。而家都仲有個小疤痕在大髀附近！當時咁頑皮，一定有畀阿媽鬧咗幾日幾夜，但係講到底，媽媽都係好錫我。明華大廈仲有個特色，是15座打後的座數依山坡而建，咁如果我哋在山坡巴士站落車，行兩層樓就返到屋企！但係15座旁樓梯打落向下，就有電車，小巴坐，行返屋企就行四層樓，係好特別嘅屋邨。
3.在明華大廈成長，你印象最深刻的畫面是什麼？最記得的人是誰？你當年日常的生活路線，例如上學/放學是如何？最常去邨內什麼地方？
答：明華大廈21座樓下有青年中心，有康樂棋可以玩，又可以報名學乒乓波，特別印象深刻係波枱石造的，所以特別彈，好好玩！仲有就係屋邨山坡路有好多車駛上駛落，其實都有少少危險，所以父母唔係太批准去斜坡路玩，但係，逢星期日，喺路邊就有雪糕車擺檔，我哋一班細路就拎住大隻的漱口盅去買雪糕，因為裝得多啲，而且仲一定排晒長龍，好受小朋友歡迎，而雪糕伯伯都特別畀多啲雪糕我哋，其實用漱口盅裝雪糕，都幾有創意，亦係當時一個好難忘的回憶，而雪糕伯伯都係令我印象好深刻嘅一個人。此外，難忘回憶仲有我哋一班細路最鍾意打風，一來唔使返學，二來，最鍾意走上9樓，因為鍾意去頂樓，仲爬樓梯上去，感受下暴雨狂風迎面而來嘅感受，其實好危險，但係當時真係覺得好好玩，好刺激，不過，當玩到成身濕晒，梗係比阿媽教訓一頓，而我哋嗰頭鬧完，轉頭又找些刺激新玩意，係有些頑皮的。我在附近慈幼讀小學，所以係行路返學放學，特別開心，就係鍾意行路！最 喜歡流連的地方係樓下空地同青年中心，仲有附近的士多，老闆有時會請我哋食雪條。
答：我的成長在明華大廈，雖然不是在富裕的物質環境下生活，但是內心非常富足，一家人相親相愛，父母好錫我哋，努力工作令我哋温飽！而鄰舍之間非常守望相助，有好濃厚的人情味，係好值得珍惜的。我爸爸在金舖工作，一星期工作六天，逢星期日休息！可能我係兄弟姊妹間排行最小，所以父母也是特別疼錫！爸爸很多時在周日放假，會在家煮飯，又會俾錢我去15座樓下士多買汽水、啤酒、香煙、零食、雪條等返屋企！當然小朋友只係吃零食，香煙、啤酒都係爸爸享用，但係作為小朋友可以拿錢去購物，好似好威水嘅一件事，所以特別鍾意星期日。而我記得15座樓下有兩家士多，好好生意，我就最鍾意買汽水，之後按樽，總之好鍾意行上行落，由細到大都坐唔定！至於媽媽都係好錫我，得閒會帶埋我去做義工，間接亦影響到我，長大之後，也有致力慈善工作！而媽媽在周六、周日，會帶我哋行落去明華大廈斜坡後面的海邊，跑下步，掟石仔，又係一個活動，純粹走來走去，吹下海風，冇乜特別，但係好開心。在明華大廈生活和成長，令我學會珍惜，和待人接物要付出關心，做人要心寬和懂得知足。
5.回想起來，你會如何形容明華大廈的生活？
答：明華大廈係我成長的地方，所有人和事及環境，我都印象好深刻，好記得！我覺得明華大廈係我人生之中一段美好嘅時光，遇上的都是好人好事！如果要形容明華大廈，我會用「簡單快樂」來形容這個屋邨！鄰舍們互助互愛，生活樸素、健康，大家都好慳儉，是踏實工作和生活的人！我非常感恩，在明華大廈成長，令我有一個健康、快樂和充滿活力的童年！完全冇諗太多關於物質的事，所以在這個屋苑成長的小朋友都比較純樸同天真，所以我永遠都會記得「明華大廈」！
後記：Aaron談到明華大廈一切，眼神閃亮，笑意盎然，很多回憶既上心頭，看得出他很緬懷明華大廈生活和各種珍貴的童年回憶。
