上星期六在家請客，到會廚師忽發奇想，認為可以將美財長耶倫在內地第一餐餐單複製，雖然沒有名貴菜式，但亦算大方得體，更何况有耶倫加持，都算跟得上潮流，我亦覺得好提議，但我睇完餐單之後，發覺少了一道名菜，如果有了這道名菜，唔使講我都會知道在哪一間餐廳宴請耶倫。
我細個時在澳門，每當阿媽問我鍾意去哪一間餐廳食飯，我會話想食金錢蟹盒，阿媽就會帶我們去陶陶居，就算去佛笑樓，都會打包金錢蟹盒，如果宴請耶倫餐單有金錢蟹盒，唔使講我都知道在陶陶居宴請耶倫。如果耶倫當晚問點解冇金錢蟹盒，主人家都唔知點解，千祈唔好以為我講笑，美國佬做嘢好仔細，一定知道金錢蟹盒是陶陶居的招牌名菜，不過，耶倫是不會問，無謂在這些小問題無風起浪，正是客隨主便。
一口炸豆腐可換上金錢蟹盒
老婆問金錢蟹盒好唔好食，細個時我覺得非常好食，但現在覺得很油膩，不過，在餐單上有一口炸豆腐，可以換上金錢蟹盒，不過就要當餐前小食，原則上餐前小食應該一熱一凍，兩款凍餐前小食對耶倫並不適合。老婆又問，無雞不成宴，點解唔見咗隻雞，我認為時近清明，燒鵝是最靚，以鵝代雞未嘗不可，但兩個豬肉菜式，叉燒與咕嚕肉一起，似乎不大恰當，其實用明蝦球代替咕嚕肉亦是合適的。
其實餐單是唔錯，稍為強化更好，例如乾炒牛河，應該寫筷子乾炒牛河，做飲食的人知道，如果用筷子炒牛河，可以盡量保持河粉完整性，唔會咁易斷。老婆話叫大廚用改良版，我話千祈唔好，今次是食時尚，我只要講今晚菜單是複製耶倫在廣州陶陶居的菜單，就已經好評如潮，加多個金錢蟹盒，將一口炸豆腐變成前菜便可以。
原刊於《明報》，本社獲作者授權轉載。
