有老友話，雖然大家都公認，中國在軍事、經濟，甚至外交方面，都是僅次於美國，是世界第二強；不過，印度很快就會追上，雖然印度地少人多，土地面積只有中國約三分之一，但人口數量已經超越中國，並且享有人口紅利。中國這個世界第二， 10 年內就會被印度爬頭，現在首先在股市市值超越香港，以4.33 萬億美元排行第四，排第五的香港只有4.29萬億美元。
我話不用擔心，在過去，中國排名長時間都是低於印度，即使印度反超前，亦不是一件奇怪的事，老友話唔明白，點解中國可以在改革開放後，幾十年間便晉升至世界第二，究竟有什麼秘訣？
中國成功秘訣在於「肯蝕底」
我話當然有原因，不過亦不是什麼秘訣，只是3個字，老友立刻話「快狠準」。我話當然唔係，一個國家的經濟體系咁大，點可以用「快狠準」做秘訣，這3個字是一句說話：「肯蝕底」。同中國做過生意的人知道，內地政府經常被外商「搵老襯」，例如圈了一幅地，只畀了訂金，然後建廠房，做生意，賺到錢都唔畀尾數，直至結束生意，甚至離開中國，將地皮賣了，才有機會找清尾數。大家唔好以為蝕底就唔好，起碼可以養活不少員工及他們的家庭；現在當然唔可以這樣做，但如果內地政府當時不願意蝕底，又未必可以做到今日的成績。
印度政府有不同做法，最初以優惠條件吸引外資到印度投資，當一切塵埃落定之後，印度政府落閘放狗，慢慢「閹」那些投資者，任何國家都冇面畀。印度總理莫迪認為，如果外商可以在印度賺到錢之後離開，豈不是很冇面，但唔肯蝕底，或導致外資投資印度減少，就算外資「翻閹」，條件一定會很辣，話晒第一次被人搵笨是不小心，第二次被人搵笨就是自己蠢，如果印度人唔肯蝕底，很難追上中國，除非中國自己出現問題。
原刊於《明報》，本社獲作者授權轉載。
