港人北上消費已經變成社會問題，有投行分析員表示要解決這個問題不難，只要開徵陸路離境稅，立刻可以降低港人北上意欲，而香港政府亦有20 億、30 億元離境稅收入，正是何樂而不為。
上周旅遊界崔定邦先生接受我訪問，我問開徵陸路離境稅這個方法是否可行，崔生答絕對不可行，應該是香港提高自己的競爭力，而非禁止市民外遊購物，佢話唔知投行分析員點諗。崔生唔明白，這是港人的DNA ，當解決唔到問題就唔准做，問題便解決了。
十幾年前，政府解決唔到樓價上升問題，首先將問題歸咎於炒家將樓價炒起，於是推出額外印花稅（SSD），禁止市民在買入住宅單位兩年內轉售，但收唔到預期效果。老實說，頭痛醫腳，又點會有效果，阿茂都知，樓價上升是因為供應不足，雖然炒家亦有責任，但供應充足，炒家自然就會失蹤，SSD推出後初期是有效，但好快失去效用，政府被迫連續推出買家印花稅（BSD）、雙倍印花稅（DSD）等「辣招」，等了10 年，到最近才「半撤辣」，可惜又唔係好時間，「撤辣」效果不顯著，不過這是題外話。
有人希望港府推出SSD 保護飲食業
雖然崔定邦話是不可行，但飲食界是極其希望政府推出類似SSD的陸路離境稅，平安夜市面相當熱鬧，大部分食肆生意都很好，不少人等位等到儍，但飲食界黃家和在聖誕節當日已經表示，港人北上消費，令平安夜生意額少了15%，較去年4.3億元降至今年3.8億元，政府應考慮管制市民北上消費，港人SSD 的DNA 出現了，生意少了，最大原因是去年仍然封關，市民被迫留港消費，今年大家出外旅遊，生意少了是意料中事；新加坡仲慘，只得去年六七成，新加坡人都晤喊，香港人點解要喊？
我問做飲食朋友，佢話今年平安夜生意一定唔會比去年少，而平安夜飲食業生意額，有冇可能聖誕節當日已經知道？估計話生意少了的人，目的是希望政府開徵陸路離境稅，禁止市民北上消費，希望官員唔會有SSD 的DNA ，否則立例管制市民北上消費，香港想唔死都唔得。
原刊於《明報》，本社獲作者授權轉載。
