有樓神同我講，以往每一次開盤之前都膽顫心驚，唔係怕賣得唔好，而是怕賣得太好，唔覺意一Q清袋，即時的確會受到老闆的嘉許，但當老闆稍後冷靜下來想想，就會覺得一Q清袋是因為售價太平，老闆是不會理會售價是不是由他決定。
總之，負責賣樓的樓神就要孭這隻鑊，老闆心情好可能只是責罵幾句，如果心情唔好，樓神隨時會被炒魷，這是新樓盤開售時的「魷魚遊戲」。
物業代理天性：兩邊鋤價
本來一Q清袋是地產商夢寐以求的事，但不知幾時開始，好事變壞事，地產商唔鍾意一Q清袋，甚至會覺得被人搵了老襯。其實恕我直言，地產商的確被物業代理搵了老襯，每一個新盤開售前，地產商一定會搵物業代理坐低傾偈，問下他們意見，究竟開價幾多才會有好成績。
物業代理天性就是鋤價，對住賣樓的人一定會講市况唔好，買樓的人不多，開價不能太進取；對住買樓的人就會話一盤難求，即使是地產商也不例外，最後得出一個低於市場價格，美其名叫買得開心價。
新樓盤有了一個價錢，物業代理就發揮他們的動員能力，不少香港人都會不斷接到那個樓盤資訊，本來是一個平平無奇樓盤，講講下就會變成一個非常優質，唔買就笨的樓盤，最後一Q清袋，物業代理又可以得到豐厚佣金。
樓盤無「一Q清袋」 老闆反而開心
本來結局是相當美滿，但當地產商靜過來的時候，就會覺得，既然咁好賣，能夠一Q清袋，點解要畀咁多優惠，又要自己做埋高成數按揭，仲要畀咁高佣金。老闆當然不會有錯，但一定要搵人做代罪羔羊，甚至暫借人頭一用，負責賣樓的樓神就是最佳人選。
不過，這是以前的事，現在很少一Q清袋，樓盤即使好賣，物業代理到了最後階段都會自動收韁，唔會再出現一Q清袋，沒有一Q清袋，地產商反而開心，覺得自己訂價英明，最後甚至會加佣去貨尾。
所以，魷魚遊戲不一定是非生即死，如果識玩，可以做到物業代理與地產商皆大歡喜。
原刊於《明報》，本社獲作者授權轉載。
