有老友在上星期買了股票，理由是五窮六絕七翻身。8月9日是農曆七月初二，股市第一個交易日，我認為老友是買得合時，不少人講五窮六絕七翻身是用新曆計算，其實應該用農曆計算，大家又睇吓股市在農曆七月會不會翻身。
移民不一定賣樓 樓價未跌
老友話我年初時已經撰文話今年樓市會有10至15%升幅，當時被人笑到面黃，因為那時候有不少人話用BNO移民去英國。移民大多數都會賣樓，多人賣樓，樓市自然下跌，點會有10至15%升幅。
其實，就算移民去英國，都未必要賣香港樓，更何況BNO只得五年居英權，五年之後英國唔收，豈不是要回流香港？既然不是肯定可以成功移民英國，點解要賣香港樓，除非英國給予那些用BNO去英國的香港人可以立刻移民，就會多一些人賣香港樓，樓價才會受壓。
老友話我預測樓市準確，其實我唔敢承認。因為我雖然預測樓市會上升，但是有一個條件，就是中港可以通關。在通關之後，就會有大量內地人到香港買樓。但原來未通關已經有不少內地人買香港樓，令到樓價節節上升，大有機會在今個星期就創歷史新高。這個結果亦出乎我意料之外，但點解還未通關，樓價指數竟然有機會創歷史新高？
未通關仍能買樓 樓價照升
有內地朋友同我講，內地各省市樓價有不同程度的升幅，各省市領導希望那些有能力買幾層樓的人，不要在他們管治的地方買樓，以免刺激當地樓價上升。在以往，那些人會在英、美等地方買樓，但現在因為美國可以隨時制裁任何中國籍人士，凍結他們的資產。
所以，已經很少中國人夠膽在那些地方買樓，他們轉移到香港買樓，有咁多內地人在香港買樓，樓價又點會唔升？所以，我估計中原指數今個星期有很大機會破頂。至於有人話破頂之後會掉頭回落，我睇這個機會不大，我反而擔心在供應不足的情况下，樓價升勢轉急，令到政府要考慮出招打壓樓市。
原刊於《明報》，本社獲作者授權轉載。
