我看蔡瀾的飲食節目，佢介紹響螺片，講完一輪之後，蔡瀾話太貴，佢唔會食，留番畀富二代食。我心想，以蔡瀾這樣的老江湖，仍然在不知不覺間歧視富二代，留番畀富二代食究竟點解，即係當他們是水魚？
我今日認識的富二代與我當打的時候有很大分別。當時不少富二代日夜顛倒，唔貴唔飲唔食，生活糜爛，我雖然不是富二代，行徑卻如是其中一份子。但很奇怪，當時不但沒有人歧視，反而有不少人羨慕富二代。
今日很多的富二代不但精打細算，而且工作積極，返工有早冇遲，我工作的大廈亦有不少是富二代，我9點半回公司，大多數富二代已經返了工，我由司機載我返工，他們則自己揸車返工，再交由司機泊車。至於生活，更加正常到不得了，富二代知道，現在資訊很發達，稍有行差踏錯，傳媒都會大幅報道，不但對自己有麻煩，甚至對整個家族都有影響。
富二代其實很慘，無老闆願意請他們，根本很難搵工，最後又要回家族公司工作，但又會被人話靠父蔭。好彩畀富二代搵到工，在公司又會被同事排斥，做得好又被同事話搶功勞，做得不好可能會被人當話柄，準時返工放工是應份，稍為遲到就會被人話這是富二代的陋習。請同事食飯會被人話是收買人心，不請又會話是孤寒。富二代到處受盡歧視，到最後只有返公司幫老竇手。
香港人也是富二代，移民之後唔做工，就會被移民國家的當地人話如果唔做工，點解要移民？如果做工，甚至做基層的工作，又會被當地人話搶他們的工作，但我相信，現在移民的人不知道他們原來是富二代，更加不知道現代人是歧視富二代的。
原載於《明報》，本社獲作者授權轉載。
