雖然有報章不時話悲情，但事實上樓市的成交價與成交量表現都不俗，尤其在復活節及清明節假期期間，不少成交都是零議價成交，大家以為零議價成交，業主一定很開心，其實並不一定，或者買家比業主更加開心。
假期期間有老友請飲茶，還有幾名朋友一起，我知道老友當然不會無端端請飲茶，果然不出所料，老友話最近賣走了一個住宅單位，買家零議價，非常開心，所以請大家飲茶。
我飲得老友餐茶，就一定不會講不利的消息，除了恭喜之外都是恭喜，但有另外一名老友話點解要開心，零議價代表買家仲有能力畀多少少，即使多2%、3%，最少都有幾十萬元，食十頭鮑都可以，何止一餐茶，不過賣仔莫摸頭，賣咗就算啦！話說咗出嚟，場面立刻變得非常尷尬。
買賣雙方開心 議價學問高深
小時候，我阿媽叫我去買一塊不見天豬肉煲湯，豬肉佬話幾多，我就畀幾多。幾次之後，豬肉佬同我講，哥仔，唔該還下價，否則佢會唔開心。自此之後，我減價，佢又加番些少，最後雙方都開心，連我阿媽都話我醒目，十歲唔夠就識得講價。
有老友賣一個物業，買家還價減一成，價錢本來都可以，但問吓我意見，我話千祈唔好，業主減一成都肯賣，買家反而會縮沙，或者要求減更多價，不如還價減半成，令到買家認為這是業主底價。其實，每一個買家最大心願，並不是以低價買到，而是可以用業主底價買到物業，這就是討價還價，很高深的學問，高深之處就是令買賣雙方都開心。
原刊於《明報》，本社獲作者授權轉載。
