有老友知道2020年財政預算有赤字1391億元，顯得非常擔心，我話有乜好擔心，亦都唔輪到我們小市民擔心，留番畀財爺陳茂波擔心。事實上有能力承受財赤也是好事，代表庫房儲備充足，可以推行一些一次式挽救經濟，或者紓解民困的措施；如果冇能力承受財赤，要節約開支共渡時艱才是大件事。所以大家要從正面的方向睇今次赤字預算案，千祈唔好睇到赤字預算已經愁眉深鎖。
有人認為政府不應該派錢，應該預留儲備用作刺激經濟，我也有這種想法，不過今次派錢是大勢所趨，各政黨都傾向派錢，甚至唔敢反對，最多用回水代替派錢。如果任何一個政黨不贊成派錢，一定會大失民心，同時會失去不少選票，所以，派錢是事在必行，陳茂波今次是非常被動，但千祈唔好話佢做錯，而事實上唔做就最錯。
盡情消費才能振興經濟
大家都聽過「養兵千日，用在一時」，香港在過去十幾年的財政預算每年或多或少都是有盈餘，豪一次亦無傷大雅。不過，亦要趁機會向世界表示香港是有能力承受巨額財政赤字，亦可以從赤字回復盈餘，將不利因素變成有利，如果有能力做到，赤字預算亦非壞事。赤字預算是警告大家，如果社會繼續動盪，香港將會陷入經濟困境。至於新型冠狀病毒肺炎疫情，我認為大家亦毋須擔心太多，中國以至全世界現在都積極開發能夠控制疫情的特效藥，香港現在最緊要是控制新型冠狀病毒擴散，有發病的迹象不但要睇醫生，而且唔好周圍去，這是香港市民應盡的責任。
有記者問我收到1萬元之後會怎樣，其實我不止收1萬元，還有2萬元退稅，免交差餉6000元。無論幾多都好，我會盡情消費，而且比我收到的多很多。大家在疫情過後亦應該盡情消費，只有消費才可以挽救經濟，如果大家都不消費，不但對經濟復蘇沒有幫助，而且還辜負了政府一番心意，因為今次派的1萬元，嚴格來說應該是消費券，當然，消費亦要量力而為。
原刊於《明報》，本社獲作者授權轉載。
