細個時阿媽教我讀唐詩，第一首佢話是一首壓全唐，連李白看到都要寫過第二首的《黃鶴樓》，詩的結論是唔好借錢畀人，債仔一定去如黃鶴，有人話我搞錯，一首壓全唐的詩應該是張若虛《春江花月夜》，我話我冇搞錯，我阿媽搞錯。
借錢如潑出去水
昨日早上回到公司，有老友打包了名店蝦餃燒賣等點心，仲話要賀一賀，老友一向是古道熱腸之人，有老友問佢借錢，很少托手踭，但近年借的人太多，佢唔借反而被人話財困，老友做生意，財困二字會令人敬而遠之，現時是借又唔係，唔借又唔係，很多時都很困擾。
老友邊食點心邊話，以後會甩難，不用再借錢畀人，理由是他看到報紙報道，有債權人同意合法將債務削減至幾個巴仙，雖然有幾個巴仙收回，但其實大家都知道，借出去的錢如潑出去的水，收回的機率是很低，但總算是持有一筆債項，仍然有一個希望，但如果以幾個巴仙清數，以後債仔就會大大聲對人講，已經還清了所有債務，做債主真的是頂住條氣，幾個巴仙不如不收，至少債仔仍然欠一筆數。
還幾個巴仙可解決債務 壞事變好事
老友話，那些借錢不還的人有一個特點，就是借得很急，都會說是救命錢，承諾還錢時間很短，差不多是上午借下午還，而且利息特別高，總之在人情難卻，「息誘」之下，很多人以為很快可以收回而借錢畀人，結果債仔收到錢即時變成「黃鶴」，一去不復返，如果還幾個巴仙就可以解決債務變成了案例，恐怕以後不會再有人借錢畀人，今次結果亦可以由壞事變成好事。
原刊於《明報》，本社獲作者授權轉載。
