有做零售、餐飲的老友話，集團不但不做晚市，而且要結束部分分店，主要原因是請唔到人，香港政府雖然話搶人才，但口惠而實不至，不但要申請，並且在申請時要證明某些職位是請唔到人，甚至有官員話未必一定要從外地請人，可以減少營業時間或者面積，官員咁樣態度，試問香港又點可以再出發。
我認為香港政府做唔到就唔應該講，首先什麼是「搶」？就是非常主動，去人哋地頭請人才可以叫做搶，等人嚟申請就唔叫做搶，就好似DSE放榜之後，大學主動去搵那些尖子，offer什麼獎學金，保證有宿舍宿位等，才可以叫做搶。大家唔好以為只有香港的大學才搶香港尖子，外國的大學亦搶香港尖子，小女會考亦是尖子，當時英美都有大學邀請入讀，但小女最後選擇入科大讀環球商業管理；老實說，如果不是入讀GB，小女一定去了外國讀書，所以，在搶的方面，香港政府太官僚主義，往往是落後別人，唔知道什麼是「執輸行頭，慘過敗家」。
由經營者搶人才 政府只需盡快放行
在政府來說，「搶人才」只是一個口號，先問政府香港究竟欠幾多工作的人，官員並非不知道，而是唔敢答，稍為有了解的人都知道，香港最少欠30萬工作的人，並不是輸入30萬人就可以解決問題，而是最少要輸入50萬人，因為有不少人未必適給在香港工作，就好似有10個單位空置，並不是搵到10個租客就可以解決問題。以我的經驗，10個租客，最少有4個在租約期內或者到期便會離開，所以，欠30萬人就要輸入50萬人才，但現在政府每年只限3.5萬人，而且仲要自己申請，等政府批核，10年都搶唔夠人，點可以用個搶字來欺騙市民。
有人話輸入足夠的工作人員，會影響香港工人的福利，其實是錯到不得了，香港有不少商廈空置，店舖食肆減少營業時間甚至結業，主要就是唔夠人做嘢，空置增加，亦令不少管理以及高級工作人員失業，變相是害了那些高素質的香港人，香港慢慢就會自我萎縮，什麼再出發只是空口說白話而已。其實，政府官員不用放下身段去搶，任由經營者去搶。
老實說，只有經營者才知道什麼人值得去搶，政府只需要「畫隻龜」，盡快放行便可以，千祈唔好為了一個本地三流人才而放棄一個一流人才，咁樣做，只會令香港愈撈愈霉，香港人才反而會被其他地方搶走。
原刊於《明報》，本社獲作者授權轉載。
