記憶係一件好奇怪嘅事，中學嗰陣，人懶又心散，5年課程，轉咗5間學校、重讀咗7年先畢業。會考之後，差唔多所有學過嘅嘢都畀返老師，不過重有幾課中文，30幾年後重係印象深刻，其中一篇係《捕蛇者說》。
1984年，中四，轉校入男拔萃，嗰陣拔萃嘅老師，個個都係性格巨星，好似「荷蘭豆」、「肥雲吞」、「金毛佬」、「短褲佬」等，聽個名都知道唔係善男信女。教我中文嘅黃樹堅老師，反而係一個無花名、無外號嘅少數派。黃老師溫文儒雅、脾氣好，有時候聽到我哋講粗口，都係笑瞇瞇一句「盧永強，小心啲講嘢。」就算，印象中老師從未發火。
老師教書風格滋油淡定，唯有教讀音嘅時候特別嚴謹、甚至有啲囉嗦，記得佢嗰次教《捕蛇者說》，花咗好長時間解釋「若毒之乎？」個「若」字點讀、同咪點解要咁讀，我哋重複又重複咁「若」咗成堂，是為中學夢魘之一。老師囉嗦嘅好處，或者神奇之處係，到今時今日我重背得出成篇課文。
呢一堂俾我好多啟發，
第一、因為一個字而記得成篇課文，我曾經將呢個經驗，寫落大學時一份關於符號和記憶嘅功課入面；
第二、因為呢個「若」字，我知道文言文中，發音、特別係正音嘅重要性；
第三、黃樹堅老師對粵語嘅研究絕對係非一般嘅堅持。
大約七、八年前，睇完黃老師關於粵語研究嘅《粵語古趣談正續編合訂本》同《粵語古趣談三編》後，更加證明我當年嘅想法正確。老師對弘揚粵語文化，有着一股堅定不移嘅使命感，更站喺最前線，用一枝筆保衛呢種有成6600萬人講緊嘅語言，好熱血！
最近老師重新編訂以上兩本著作，重加多一本《保衛粵語．保衛方言》，同學當奴黃問我，可唔可以寫番篇文章講下老師嘅書，或者就咁講下粵語都得。由於唔少師兄弟同其他媒體都已經有詳細介紹，我唔想重複嘞，反而想從另一個角度講下粵語。
我係一個設計師，做得最多嘅工作係企業識別，即係Corporate Identity。Identity、識別、形象、特色、身分呢啲字眼，成日喺我工作同生活中出現，朋友都鐘意問我，俾我揀一樣代表香港嘅Identity，你會揀啲乜？其實唔駛點諗，最能代表香港，最具香港特色嘅一定係粵語。
有人會問，咁廣州呢？唔……佢可能好少返大陸。
粵語嘅凝聚力
我喺黃大仙下邨長大，六、七十年代嘅時候，嗰度係一個江湖，街坊嚟自大江南北、五湖四海，紅藍左中右黑白道，真係乜人都有。最過癮嘅係，無論你係邊個鄉下，講乜話，大家都自然咁用粵語溝通，就算有啲街坊講到甩頭甩骨，佢哋都好努力咁學習，一啲都唔怕面懵。
年少無知，記得問過隔離屋嘅外江亞叔，點解你啲廣東話咁核突？
「鳥！我20幾歲走日本仔嚟香港，喺呢度揾食，梗係要識講白話喇！做戲個于素秋唔識講都要配音俾你睇啦細路！」我真係從阿叔把口先知粵語長片個俠女唔識講粵語，重學曉世界上有一樣嘢叫配音。
就算今日，我哋去譚仔食米線，成日笑班阿嬸講譚仔話，即係甩甩咳咳嘅粵語，我哋香港人都好尊敬佢哋對講粵語嘅堅持。
無論係邊個年代，喺香港生活，學識粵語，唔止係搵食咁簡單，重係一種對本地文化嘅尊重。
粵語嘅靈活性
舊時無乜娛樂，基本上幾代人都係電視撈飯長大，以我為例，睇得最多嘅除咗卡通片，就係「粵語長片」。鍾意「粵語長片」嘅原因好簡單，貪佢片種多又垃垃雜雜，啱晒我呢亭蠱蠱惑惑嘅細路。小學時最鍾意睇新馬仔嘅戲，因為入面嘅粵語對白夠盞鬼，佢求其一句「哎吔，弊傢伙喇今次。」唔知點解就喜感十足；龍剛嘅電影就成日用「做乜撚化我？」由於聽落似粗口，又係笑死我。後來識咗個老導演，先知道除咗唱大戲之外，新馬仔同鄧寄塵嘅時裝片，九成九都係無對白稿，全部爆肚！嗰陣年紀輕，只覺得粵語好獨特，淨係發音同語調已經變化萬千，有好多個層次。
粵語除咗通俗多變之外，重有佢優雅同優美嘅另一面，初中開始識得欣賞粵曲，最鍾意聽《再世紅梅記》同《帝女花》，尤其係《帝女花》嘅《庵遇》，每次聽到「飄渺間往事如夢情難認。」「百劫重逢緣何埋舊姓。」都會毛管戙。可以咁講，真係只有粵語先可以唱到呢種如詩如夢嘅境界。
粵語係香港嘅軟實力
嫌我睇「粵語長片」老土？咁有幾多香港人唔係睇無綫嘅電視劇長大嘅呢？遠至《狂潮》，近至悶到嘔嘅《溏心風暴》，幾十年嚟都係牽動各位電視迷嘅神經；事實上，香港出產嘅電視劇、港產片，一直都係數以千萬計嘅海外華人嘅精神食糧。
煲劇嘅先决條件，就係要識粵語。
所以那些年，香港透過影像輸出粵語、同普及粵語，足足影響咗幾代華人。重未講我哋稱霸華人樂壇幾十年嘅粵語流行曲，你今日去北京或台北，差唔多所有夾Band嘅都唱《海闊天空》，首歌嘅地位係等同Hotel California。
今日
回歸21年、一國兩制下嘅香港，粵語仍然係我哋嘅主要溝通語言，但係今時唔同往日，我個人角度，唔少粵語已漸漸流失，或以粵音普通話取代，雖然個個都話變幻原是永恆，粵語之後喺香港嘅地位、發展，真係有賴黃老師同各方專家持之以恆嘅研究同保育，而我哋呢班以粵語為母語嘅香港人，亦都要身體力行支持。
後記
90年代，全港市民都流行學倉頡，我家姐上幾堂工聯會進修班後都學識，而我呢個日日對住電腦做人嘅細佬學極都唔曉，我諗原因有三：
第一、情感上覺得倉頡以字形取碼唔合邏輯，先入為主，無乜心機；
第二、我記性差，點都記唔入腦；（應該呢個係最大可能）
第三、相信科技發達，世間上一定會有其他比較容易嘅中文輸入法。 最後，我發現一個叫「廣東話輸入法」嘅網站，一切以粵語拼音或英文為主，簡單易用，一直用咗十幾年到今日。 後嚟做雜誌，同某編輯為中文輸入法辯論，佢話打中文、用倉頡先係王道，廣東話輸入法粗俗又唔專業。 我同佢講，基本上我可以用粵語拼音打晒所有我需要嘅中文，包括呢篇！粵語粗俗？真係睇你點睇自己嘅方言，你唔識發音，一定打唔到隻字，識得發音，又打得啱，我真係恭喜你，因為你除咗識多一種輸入法外，重代表你能夠讀出最優雅嘅中文。
講多啲粵語，已經係保衛粵語。
黃氏讀後感
盧永強的粵語行文極有味道，令人驚喜！相信所有上世紀中期出生的人讀來都會特別有共鳴，而年輕一輩讀來也會覺得饒有趣味！文中有很多地方說出了我心中的話。現在略舉三處如下︰
一、揀一樣代表香港嘅Identity，你會揀啲乜？其實唔駛點諗，最能代表香港，最具香港特色嘅一定係粵語。有人會問，咁廣州呢？唔……佢可能好少返大陸；
二、無論係邊個年代，喺香港生活，學識粵語，唔止係搵食咁簡單，重係一種對本地文化嘅尊重；
三、講多啲粵語，已經係保衛粵語。
最近，短期內讀了黃永及盧永強兩篇文章之後，我更加覺得，香港人應該建立一個粵語文壇，鼓勵所有香港人用粵語創作散文（包括各種抒情文、說明文、議論文、新聞稿、通訊……）、詩、歌詞（用百分之一百「粵語詞」寫的歌詞──現時符合這個要求的，似乎大致上只有黎彼得先生的詞）、劇本（包括各種話劇劇本、電視劇劇本、電影劇本、粵劇劇本）、對聯……，而可以肯定的是，黃永、盧永強在這方面一定會有更大貢獻！
