上星期去了匯豐的春節酒會，當日福布斯放榜，頭 50 名富豪，最少有 20 名在酒會，老實說，我本來唔鍾意匯控（0005）CEO 祈耀年，但自從佢反駁昔日中國大好友羅奇話香港已玩完之後，我認為祈耀年非常有「吉士」，對佢完全改觀。
我認為祈耀年要頂住相當大的壓力，才可以反駁羅奇，不過亦要付出代價；祈耀年講完之後，匯控在業績理想下，股價仍然下跌 5%，或者，這是睇衰香港的人對祈耀年發出的一個警告，如果唔跟着劇本講，匯控有排冧。
不少人相信，現在全世界傳媒正在圍剿香港，好嘅地方當然唔會講，唔好嘅就要 post 多幾次。彭博研究話，去年跨國企業在新加坡設立地區總部的有 4200 家，香港只有 1336 家，有人以這個理由認為香港已經玩完。但他們有冇考慮，跨國企業在香港設立總部的遠多於新加坡，甚至可以講香港甲廈需求已經飽和，但新加坡仍然有龐大需求，情况就好似大仔增高速度比細仔慢，冇人會覺得奇怪，更何况去年香港才正式解封，一切仍未復常，今年才上力，明年才可以見真章。不過，最奇怪的是2016 年已經有這個數據，當年已有 4200 家跨國企業總部設立在新加坡，與今日一模一樣，設在香港的總部有 1389 家，比今日稍多 4%，有多少不明白，唔通真係「咁啱得咁蹺」？
全球傳媒圍剿香港
既然是圍剿，就唔止羅奇同彭博研究咁簡單，福布斯都加入圍剿隊伍。福布斯表示，香港房地產將面臨 20 年來最嚴重衰退，而且睇唔到緩解迹象，咁樣講打破我對福布斯認知。我一向以為福布斯只是為富豪秤身家、講排名，唔會做評論，尤其是咁武斷的評論，這應是福布斯要嚴守的規條，現在連福布斯都放棄自己身份，加入圍剿隊伍，這場仗，香港的確很難打，不過，難打都要打，鬼叫你窮，頂硬上。
原刊於《明報》，本社獲作者授權轉載。
