同事話為防有來訪的租客確診，要所有公司同事入竹篙灣，所以約租客在茶餐廳傾租約，不過，在現階段，雙方仍然有些少距離，在茶餐廳又唔可以坐得太耐，有很大機會未能傾掂，如果傾唔成應該點做？
傳媒講啲唔講啲 市民嘲笑袁教授
我話四川人傾生意唔會去茶餐廳，一定去食火鍋，如果打一次火鍋傾唔成，就食兩次，租客開門做緊生意，點會傾唔成，如果傾唔成，就明日再去茶餐廳飲杯咖啡，傾多一次，四川人有鍥而不捨精神，做事成功的機會比做少一次的人大得多，香港人又點解唔可以？
同事問袁教授是不是四川人，點解他抗疫方法咁有四川feel？佢叫人如果覺得戴一個口罩未夠功效，就戴兩個口罩，阿茂都知道戴兩個口罩的保護能力比戴一個口罩好，唔需要由專家講出來。
我睇過這個訪問，傳媒的報道斷章取義，原本是記者問袁教授，如果一個人因為年紀太大或者有疾病，不適合打疫苗，如何抗疫？袁教授話戴兩個口罩，一定會比戴一個口罩好，袁教授少少都冇錯，但傳媒講啲唔講啲，令到市民以為袁教授叫人戴兩個口罩抗疫，同時出現有很多種戴兩個口罩方法，其實是嘲笑袁教授。
戴兩個口罩識別未打疫苗人士？
現在有75%市民打了疫苗，他們當中有不少人投訴，唔知道平時接觸的人有冇打疫苗，袁教授的方法其實是一個大躍進，就是要求未打或不能打疫苗的人戴兩個口罩。
首先是對戴雙口罩的人多一重保護，其次是對其他人講那人沒有打疫苗，令到別人對他有防範，我相信這亦是袁教授本意，傳媒亦可能意會到。不過，傳媒唔講，只係話袁教授的抗疫方法是戴兩個口罩，令到全世界的人都會認為香港專家的抗疫真神奇，與印度專家叫人飲牛尿差不多。
原刊於《明報》，本社獲作者授權轉載。
