有老友不明白，點解在報章上經常睇到劈價蝕讓，但最近兩周中原指數反而上升，兩者極不吻合，究竟是傳媒誇大抑或中原做假？
劈價蝕讓 樓宇素質不好？
老友的想法不能那麼極端，中原指數是有一套機制去制定，如果沒有改變機制，就不能話中原指數做假。至於劈價蝕讓，就算是大升市都會發生，問題是傳媒有沒有報道。最近傳媒集中報道樓價下跌，所以就會用一些劈價蝕讓做例子。
老實說，打算買樓的香港人很少理會那些劈價蝕讓，因為他們知道，如果一定要業主劈價蝕讓，能夠買到的樓宇素質亦不會好，他們都只會因應自己需要以及能力來買樓。如果問親戚朋友，10個之中有9個話唔好買，有半個話睇定啲，所以我經常話，買樓自己決定，千祈唔好問親戚朋友，更加唔好睇報紙評論，見到咁多劈價蝕讓又點會以市價買樓。
一般人打了3針 感染應該冇事
近日香港政府畀Omicron搞到頭痕，究竟開唔開關，to be or not to be？如果Omicron好似Delta咁強勁，就不用考慮，一於繼續封關，但Omicron弱過感冒，如果繼續封關又講唔通。
如果叫所有公務員投票，贊成繼續封關的佔大多數，很簡單，不少公務員可以繼續WFH，行山湊仔，悉隨尊便；但如果問商界，即使是打工仔，都會支持通關，他們會話，再唔通關就可以死得啦！To be or not to be，梗係特首的工作，蟻民諗都多餘。
政府話是否通關，有很大機率是取決於疫苗接種率。我絕對同意，但現在已經超過九成，政府仍然未開關。我講大家唔會相信，死亡率就是通關理據之一。現在，死亡的大多數是未打疫苗的長者以及有隱疾的人；一般人打了3針疫苗應該冇事，就算受到感染都好似小感冒一場，所以，有很多打了疫苗的人都希望早一些確診，甚至有人會話確診如首置，愈早愈好，因為確診之後就好似打了疫苗第4針，再次確診的機會就微乎其微。
老實說，我都有多少心郁，希望早日確診。
原刊於《明報》，本社獲作者授權轉載。
