在差餉物業估價署發表樓價繼續上升，以及有不少評論表示樓市在第三季會創新高之後，業界開始有人擔心政府會對樓市加辣。有老友問我會唔會加辣？我話少擔心，現在政府官員「忙到隻積」咁，邊度有時間考慮加辣，況且現在的辣招已經很辣，基本上是加無可加，無謂自找麻煩。
我有時唔係幾明白，在幾個月前，業界有不少人叫政府減辣，彷佛不減辣樓市就會死。其實，在社運及疫情夾擊之下，樓市成交量下降亦是正常，用減辣來刺激成交可能得不到預期效果。事實上，政府在工商物業有減辣，將工商物業印花稅回復正常，但減辣之後成交量並沒有急升，直至最近，市況轉佳，工商物業成交才增加。所以，在市况不佳的時候叫政府減辣，可能是浪費彈藥。
政府收回新樓空置稅，其實已經是讓了一步，或者可以說是「減辣」，如果政府堅決推出新樓空置稅，首當其衝受到影響的一定是豪宅，影響所及，有可能令到樓市下跌，所以，千祈唔好太苛求。嚴格來說，取消新樓空置稅雖然不算減辣，但可以接受。
有老友問點解業界有人擔心政府會加辣？其實，這亦是促銷手法之一，擔心政府加辣，即是叫有心買樓的人要早下決定，有買趁手，否則政府加辣，就要多付印花稅，甚至有錢都買唔到。
原刊於《明報》，本社獲作者授權轉載。
