有老友話離婚，我話幾十歲人，點解仲搞離婚，是否有小三，被老婆捉個正着。老友誓神劈願話沒有，但佢老婆的大媽朋友認為佢有，叫佢老婆日哦夜哦，一定要哦到老友認有小三為止。那一班大媽朋友又叫老友認咗佢，仲擔保可以說服佢老婆只有些少懲罰，或者買幾個包包便可以了事。
老友迫於無奈於是無中生有，認了有個小三， 誰不知袈裟未着愁多事，着起袈裟事更多。老友認了之後，那班大媽朋友叫佢老婆與佢離婚，之前講什麼些少懲罰，完全唔記得。我話老友少讀書，如果有睇那位很悲慘法國公司阿爾斯通怎樣墮入「美國陷阱」，就不會承認有小三，最多被佢老婆冷落多一陣，最後有機會無罪釋放。
中國坦白從寬 美國認罪更大鑊
在孟晚舟被捕初期，我曾經撰文講千祈唔好認罪，就算失去自由都唔好認，因為美國與中國的取態不同，中國是坦白從寬，抗拒從嚴，愈早認罪所受到的懲罰愈輕，但在美國如果認罪，生殺大權就在對方手裏，不會有好下場。
但唔認罪亦要有很大的忍耐力，因為身邊一定有不少人，甚至是自己團隊的人，提議以認罪換取自由，但認罪之後不但失去自由，而且會連累更多人失去自由，公司亦會有損失。
但唔認罪就唔知幾時可以有自由，要有着一旦失去自由，便失去自由的打算，唯一可以做到的就是堅持，孟晚舟這個堅持，就堅持了1028日。現在，有很多人已經認識到美國有這個陷阱，如果不想墮入，唯有避開這個陷阱。
原刊於《明報》，本社獲作者授權轉載。
