據報道這幾日復活節假期，大約有70、80萬人離開香港，令到市面很靜，連澳門都贏香港，今次香港真係好大鑊？
港人有錢旅行 反映經濟不壞
我認為市面靜反而是好消息，那70、80萬離開香港的人並不是去其他地方做短工，而是去旅行，既然有咁多人有錢去旅行，相信香港的經濟狀况並不壞，不用杞人憂天。反過來說，如果很少香港人出外旅遊，形勢反而不妙，千祈唔好將好消息當成壞消息。
在紐約住過的人知道，在每一年聖誕節，紐約市面非常靜，鬼影都冇隻，大家唔好以為紐約人去了旅行，其實是大多數人回家探親，紐約居民未必會在假期出外旅遊，寧願享受片刻寧靜。
周邊地區復活節不放假 到港遊客相對少
大家又唔好以為在這幾天出外旅遊的人經濟非常好，老實說，他們的經驗並不差，但唔可以講非常好，如果經濟非常好的話，反而唔會在這幾天出外旅遊，無謂付出較多費用，以及同人迫，好似去日本，等過關都要等4、5個小時。
事實上，不少有能力在平日放假而又經濟不錯的人，這幾日就會留在香港，大家千祈唔好以為留在香港的人的經濟不佳，其實他們只是不想出外旅遊。
復活節假期其實很奇怪，不但假期長，而且與周邊的地方不配合，形成只有香港放假，造成出外旅遊的人多，到香港的人少，所以，復活節假期不如修改，4日實在太多，3日就可以，另外一日給予穆斯林的開齋節，估計天主教徒亦不會反對，香港穆斯林亦可以在開齋節與家人一起慶祝，這才是香港精神。
原刊於《明報》，本社獲作者授權轉載。
