佢講股你要聽？佢，當然係指股神巴菲特（Warren Buffett）。
早前介紹「醒目指數」（Sharpe Ratio，即回報對波幅比率），提到從1976至2011年間股神旗下巴郡（Berkshire Hathaway）表現冠絕股壇。論回報，巴郡平均每年超額回報為19%，是同期大市6.1%的幾倍；論波幅，巴郡平均標準差是24.9%，比同期大市的15.8%略高。合計每一單位風險可獲得的超額回報，巴郡以0.76的醒目指數比其他基金的高出近倍。長期跑贏大市，令不少經濟學家眼鏡大跌，讓一眾財經演員無地自容。
怎樣解釋巴郡的醒目指數冠絕股壇呢？價值投資法？有效市場的原教旨主義者會話：「幻覺嚟嘅啫，嚇我唔到嘅。」幻覺，指嘅係價值投資法比「落雨去離島，離家飲煉奶」更虛幻，股神的醒目表現純粹符碌。
到前幾年有金融專家分析了巴郡以往三十多年的揀股策略，發現價值投資法竟然解釋得到巴郡的醒目表現！簡單講，股神揀股三寶是抵買、安全、優質。複雜說，抵買即是低啤打（Beta，金融風險的一種量度），安全即是低市帳率，優質即是賺錢、穩定、增長及高股息支付率。
所謂「與啤打對賭」（Betting Against Beta），揀股策略就是揸低啤打沽高啤打的股。與啤打對賭賭得過，皆因市場上水緊的投資者傾向谷高高啤打資產的價格。
0.76的醒目指數其實不算超級醒目（一般基金經理聲稱追求的是高於一的醒目指數），但長期來說只要比市場醒少少，然後適當地運用槓桿把醒少少轉化為賺多多。正如股神曾憶述過：Ben Graham taught me 45 years ago that in investing it is not necessary to do extraordinary things to get extraordinary results。
此法弔詭之處，是表面上比股神葉天留給方展博的股票必勝法貼地，但執行起來卻其實離地萬丈。今天，與啤打對賭已不是甚麼秘密，而即使你搞不清楚甚麼beta定alpha，哄衫領掹車邊跟股神揀股有幾難？問題是，與啤打對賭之所以有效全因市場上投資者一般水緊，沒有槓桿經不起風浪，最終又是佢係股神你唔係。
金融專家的股神分析信不信由你。還是不信？信信股神吧。股神講股你要聽，佢建議你買低收費的指數基金，咪信財演咪益基金佬（言下之意亦叫你咪學佢，因為學唔嚟）。
本周的推介基金是指數基金（真．懶人基金），因為你係股神，鬼得閒睇我啲文咩。
原刊於《am730》，本社獲作者授權轉載。
