星期日早上去到茶餐廳，有很多客人講BNO移民，有人話好快就會用BNO去英國。不過 ，移民不是為了自己，而是為了小朋友，話香港的教育太緊張，填鴨式教育令到小朋友連童真都冇晒，去到英國比較自在一些。老闆話，全世界都是填鴨式教育，如果唔填，就唔使旨意入一流大學。小朋友有童真，日後就很難搵食，最後反而被子女埋怨。倒不如現在填鴨，小朋友唔讀就冇辦法。老闆又話唔明白客人，移民是家長做決定，點解咁多家長話為了小朋友移民，有時聽到都想嘔。
英國話自己好心才推出BNO計劃，或者的確是好心，但可能好心做壞事，拆散了不少家庭。本來，有很多人都不打算移民，但現在英國推出BNO計劃，好似一張免費Coupon，唔用唔抵。但如果移民，多年來在香港所建立的事業就沒有了。所以，有很多家庭是女移男不移，資產也不移。這些家庭我亦見過唔少，最後都是離婚收場。那些移了民的女人不會直言她已離婚，但在日常的談話，會由最初稱她們的老公為丈夫，慢慢地就變為前夫，聽到的人都明白，唔會問那些在外國女人是否已經離了婚。
英推BNO計劃 或拆散不少家庭
有人話我危言聳聽，不少夫妻都非常恩愛，好比唐玄宗李隆基同楊玉環：老婆在外國帶住小朋友，老公在香港繼續拼搏。幾年之後，兩夫妻再匯合，共享美好人生。哈哈，這是文章才可以表達的意境，丈夫丈夫，一丈之夫，兩公婆分隔東西半球，能夠保持名分已經唔錯，如果白居易現在再寫《長恨歌》，就唔會寫「一別音容兩渺茫」，而在現今世界，「一別音容兩秒忘」才是真的。
最衰都是個衰仔，讀完大學，在英國難搵食，又見老竇撈得唔錯，竟然回港跟老竇搵食，做阿媽就會孤伶伶一個人。唔怕，外國有很多小鮮肉，只要有錢就有得食。所以，如果有人問我移民的意見，我話只有一個條件，兩公婆一起移就可以，千祈唔好相信男人講海枯石爛的說話，如果見唔到就一別音容兩秒忘。
原刊於《明報》，本社獲作者授權轉載。
