政府搞夜繽紛會不會成功，我認為睇結果，如果參與夜繽紛的生意人有錢賺，就會繼續玩落去；如果蝕錢，就會好似十個救火的少年，走吓一個，走吓又一個，最終夜繽紛又會無疾而終，官員又算做了一件事，甚至可以寫在政績裏，唔成功是做生意的人做得唔好，唔關政府的事。
生意人做生意的基本要求很簡單，就是「殺頭的生意有人做，蝕本的生意冇人做」，不過，政府唔係生意人，最鍾意做蝕本生意。
有老友話我亂噏，叫我舉例以說明之。其實很簡單，到今日政府仍然唔肯撤辣，甚至未有考慮撤辣，就是認為辣招可以增加稅收，如果撤辣就即是同庫房作對。所以，所有官員從來唔會講幾時撤辣，或者在什麼情况下撤辣，但如果官員知道，辣招原來令政府收少很多稅，咁樣就不得不考慮撤辣。
非港人用有限公司買住宅避辣稅
究竟政府官員知唔知道辣招令政府收少很多稅，我問過一名初級官員，佢話絕對知道，不過大家都唔講，不但唔講，仲在有意無意之間教育市民，辣招令政府增加稅收，如果撤辣，政府一定有損失。在潛移默化之下，大多數市民不同意政府撤辣，尤其是那些冇樓又唔打算買樓的市民，撤辣令稅收減少，直接令他們的福利減少，政府有咁大族群支持，想撤辣都難。
現在到了一個情况，政府想唔撤辣都唔得，由於非香港人與用有限公司買住宅單位的人都是要繳付30％印花稅，所以，很少人會用私人名義買樓，差不多全部都用有限公司。當某一日那些業主要賣樓的時候，買家只需要付大約樓價0.1%的公司轉讓印花稅，而非30%非香港人買樓特別印花稅，兩者相差300倍。雖然用公司股權轉讓來買賣物業是有很大風險，但在巨額印花稅之下，仍然值得一博，如果買家只需要付正常4.25％印花稅，估計有九成買家唔敢用公司股權轉讓來買賣物業，現在已經有太多人用這個方法，令到政府物業買賣印花稅收入大幅減少，不但收唔到30％辣招稅，連正常4.25％都收唔到，唔通官員唔知道？當然唔係，不過，官員們以不變應萬變而已。
原刊於《明報》，本社獲作者授權轉載。
