在過去 10 日，長時間 10 號風球以及黑雨重創香港，有收租業主同我講，今次真係大大鑊，估計維修工程要用好多錢，但唔做又唔得，唔做租客有權走人，打算向銀行申請一筆維修基金，否則在一時之間都冇咁多現金，希望銀行唔會「托手踭」，我相信如果用嚟做維修工程，銀行是樂意批出貸款。
利息上升早準備
今次真係人算不如天算，不少業主對利息上升早有準備，最有效策略就是降低借貸比率，但「顧得頭來腳反筋」，估唔到 10 號風球之後又有黑雨，搞到有不少出租單位出現漏水及水浸等情况，由於時間太長，影響到單位內裝修及結構，大型維修是無可避免，今次真係破財擋災。
有老友話今次真係多謝政府出招，令到佢不能夠多買一個單位收租，否則現在就很頭痛，不但無端端要使一筆錢，仲要搵地方畀租客暫住，仲問我們有冇麻煩。
颱風兼黑雨 樓宇維修不可少
我話冇就呃人，現在真係頭痛到癲，好彩公司的同事是一班願意擔當的人，昨日已經與租客聯絡，解決受水浸影響問題；事實上，差不多每一個租客都面對不同的問題，只能夠見步行步，首先解決即時問題，有一些單位甚至要做大維修，今次都唔知唔見幾多錢，不過都冇辦法，如果唔係就唔會叫天災。
這個故事話畀大家知，做收租業主真係唔容易，不但擔心樓價下跌，被銀行追差額，亦要擔心利息上升，現在連天災都出現，以後搵人買樓收租都唔係咁容易。所以，政府亦可以考慮放寬香港人買第二個住宅單位的辣招稅，估計現在即使放寬，買樓收租的人亦不會明顯增加，因為大家都唔想在打風落雨時瞓唔着，就算瞓得着都會發噩夢，今次黑雨真係驚醒了很多人，原來買樓收租都有很多煩惱。
原刊於《明報》，本社獲作者授權轉載。
