香港回歸後推行所謂問責制，講的人大義凜然，又幾好聽，但實際做唔到，因為香港人，尤其是做官的人太醒目，如果要問責就不如唔做，唔做就唔會錯，就唔會丟官，而事實上又沒有官員因為問責制而下台，問責制應該正名為不問責制。我初回港做工的時候，上司教我12字真言「多做多錯，少做少錯，唔做唔錯」，仲話如果唔用這個方法，很容易會被炒魷‧我當時不明白，點解會有上司教下屬唔做嘢，後來我知道，上司知道我是一個威脅，如果我唔做嘢，就唔會威脅到佢，不過，他亦是這12字真言信徒，所以，不用太久就要移民。
當我有下屬時，我也用12字真言教他們，不過有些少不同，就是「多做少錯，少做多錯，唔做全錯」，曾經有下屬以為我跣佢，其實不是，我解釋話做得多，工多藝熟，出錯的機會就會減少，做得少就工藝生疏，出錯的機會就比較多，至於唔做，的確沒有出錯，但亦沒有完成任務，其實是最錯。
不過，香港官員不大明白這個道理，以為唔做唔錯，社會運動由警方揹鑊，什麼黑警，獨立調查全部由警方承受，今次武漢肺炎，官員又採取同樣手法，以為疫情會突然消失，沒有做好防範工作，現在情况急劇轉壞，香港政府連最基本應變措施亦沒有準備，連口罩都要去信國務院要求國家支持，在這個時候還給中央政府添煩添亂，這算是什麼問責制？
封關無可避免 醫護須放下成見
不過話分兩頭，林鄭回港後已經推出一些措施，例如限制湖北省人士入境，設立隔離營地。所以，在這個時候不應給政府添煩添亂，有醫護人員鼓吹現在罷工，除了要求政府封關之外，還要求加薪等。有外國朋友不明白，他認為在過去七個月社運，醫護人員贏盡世界輿論，大部分民意都是企在醫護人員那一邊，今次鼓吹大罷工可謂盡失全世界民心，所以，我認為醫護人員先要放下成見，要求封關是可以，至於加薪最好不要提，警方做了七個月仍然未提出這個條款，無謂自己做醜人。另外有一些專家話政府已經失去了防疫先機，老實說，佢唔講大家都知道我亦不滿意這個政府，但在這危難關頭，應該放下成見，黃藍不分，上下一心才有機會渡過今次難關。
不過，以現時情况來看，封關是無可避免的事，政府亦不用太猶豫，趁「武炎」尚未大爆時封關是正確做法，我並不是給政府壓力，而是封關可以減少政府壓力。
原刊於《明報》，本社獲作者授權轉載。
